Reconocemento pa ex-Burgemeester Kompier di Venray na Hulanda

ORANJESTAD (AAN): Durante di un ceremonia special na Gabinete di Aruba, ex burgemeester di Venray Leontien Kompier a ricibi un reconocimento di Gabinete di Minister Plenipotenciario di Aruba.

Na e ocacion aki a nombra señora Kompier como “Loyal Amity Envoy”.

   Minister Plenipotenciario mr. Ady Thijsen hunto cu Prome Minister mr. Evelyn Wever-Croes a haci entrega di un escultura di glas den forma di un Watapana como simbolo di e reconocimento aki. E reconocimento aki ta pa señora Kompier su sosten incondicional na Aruba y tambe su sentimiento caluroso pa nos pais.

   Minister Thijsen a cuminsa bisa cu desde un principio su persona tabata tin un click caluroso cu señora Kompier y di su banda a mustra cu e ta habri pa yuda pa yega na formanan di cooperacion entre Venray y Aruba. ‘Ta door di e bon contactonan (conhunto cu miembro di gemeenteraad di Venray Amira Luydens-Dabian) cu a papia di bin cu un “intentie verklaring” entre Venray y Aruba riba e tereno di apicultura y un exposicion riba carnaval.

   Pa loke ta apicultura, nos a papia cu Universidad di Wageningen cu tambe a mustra interes pa cooperacion ’

   ‘Esaki ta e dinamismo di un persona manera Leontien Kompier cu a mustra cu e tin un curazon grandi pa Aruba y cu e lo kier coopera cu Aruba; haci algo pa Aruba. Tambe despues di su funcion como burgemeester di Venray y pesey e merece e reconocimento aki,’ asina minister Thijsen a bisa.

Prome Minister a gradici señora Kompier pa su sosten na Aruba. Premier Wever-Croes: ‘Despues di e pandemia nos ta busca formanan di cooperacion. Mi ta spera cu e palabracionnan haci tocante intencion pa cooperacion, rapido lo por keda concretisa, pasobra esaki lo nifica hopi pa Aruba.’

Leontien Kompier su prome palabranan despues di a ricibi e escultura tabata cu e ta sintie hopi honra. ‘Ta un hecho cu desde un principio tabata tin un bon click cu e team di Gabinete di Aruba y for di Venray tabata tin e intencion pa concretisa e cooperacion. Mi ta spera cu mi susesor Michiel Uitdehaag lo sigui riba e mesun caminda. Ami na un otro manera ta dispuesto pa mira kico mi por sigfinica pa Aruba y pa cu e cooperacion cu Hulanda.

Pami esaki ta comienso di un combersacion pa mira na cual manera nos por haya otro y reforsa otro. Mi ta dispuesto pa haci uso di mi experencia y conocemento pa mira unda mi lo por yuda,’ tabata e palabranan di Leontien Kompier despues di a keda reconoci pa Gabinete di Minister Plenipotenciario como “Loyal Amity Envoy” pa Aruba.  E potretnan ta cortesia di Aruba Huis.