ORANJESTAD (AAN): E Comision di Himno y Bandera di Stichting Parochieraad Santa Cruz ta invita henter pueblo di Aruba y
particularmente esnan cu ta di e distrito di Santa Cruz, pa un grandioso Dia di Famia, dialuna, 18 di maart 2024, den Centro Curason.
Pa 9:00 am lo habri dia cu Santo Sacrificio di Misa di gradicimento na Misa “Inmaculada Concepcion” cu canto di Coro Inmaculada Concepcion.
Despues di Misa lo hisa e Bandera di Aruba riba parking lot pariba di misa y Julivienne Gumbs, cu Erick Rincones riba guitara, lo entona Himno di Aruba.
Riba e programa cultural cu ta sigui na Centro Curason, tin pa deleita e publico dushi musica di Caha di Orgel, Baile di Cinta autentico y otro bailenan folklorico. Tur esaki intercambia cu cantantenan cu a resalta den e Festival “Un Canto pa Aruba su Himno y Bandera”.
Bin disfruta y apoya nos talentonan nacional. Cushina ta na ordo cu e.o. e tan gusta bacalou y sanger yena di Ramiro. Y no lubida, e mesa di cos dushi mes! Bin cu bo famia y pasa un dia inolvidabel.
