Mal holo ta afectando bario Simeon Antonio:
*Cu ayudo expertonan Hulandes di Witteeven Bos
ORANJESTAD (AAN) – Minister Ursell Arends, titular di Naturaleza, Transporte, Integridad y Asuntonan di Adulto Mayor, a declara den entrevista cu DIARIO cu den e transcurso di aña 2023 (Juli y November) su ministerio a ricibi dos carta di habitantenan di Simeon Antonio, den cual nan ta papia di e mal holo cu ta invadi nan bario.
Esun di Juli tabata di e Stichting Parkietenbos, unda nan ta señala cu tin molester di e mal holo, cu no necesariamente ta di Ser’i Teishi, pero e ta bin di e land field di Parkietenbos mes.
E mandatario a menciona cu e ta bisa esaki pasobra gobierno a stop e sushi di yega na e dump di Parkietenbos, loke no ta nifica cu e candela a paga automaticamente.
E dignatario a señala cu desde e añanan cu a pasa nan ta trahando cu expertonan di Hulanda, di Witteveen Bos y haci un termal drone di full e seroe cu tin na Parkietenbos y den e seroe tin candela cu nan ta yama ‘smoldering’ anto esaki ta causa cu tin candela ta broei den e seroe cu constantemente ta saca huma y ta molestia e habitantenan aki. “Y den e proceso aki nos ta den e momentonan aki, den e siman di 18 di Maart bin ariba. Expertonan di Hulanda lo ta na Aruba pa wak con nos lo cuminza prepara con nos ta bay prepara cu esaki. Pues, a stop sushi di yega e dump di Parkietenbos pero esey no kiermen cu bo a resolve henter e problema cu tin cu e land field. Tin trayectorianan cu ta bay wordo encamina awor, un cura nobo lo bay wordo traha, despues di esaki lo bay deal cu e problematica di asbestos y despues nos lo deal cu e ‘steep steil’ cu tin banda di lama y e di cuater proyecto ta pa atende cu e candela, cu nos por paga esaki, tapa e seroe y converti esaki pa final di 2025, of mas trempan, den un solar park”, e dignatario a relata.
El a agrega cu e tin comprension pa e kehonan cu ta sali, y e mes tabata tey dos siman pasa Diasabra pa bishita e Seroe pa constata cu e problema di holo ta afecta full Bucutiweg tambe y ora biento bira e ta mas insoportable ainda. “Dus, nos tin nos atencion. Gobierno di Aruba tin acuerdonan cu e expertonan di Witteveen Bos y e candela cu tin eyriba solamente profesionalnan por atende cu esaki. Pesey nos ta busca ayudo di expertonan hulandes pa asina nos por encamina e proceso, pa conhuntamente cu nan atende e problema cu tin riba dump di Parkietenbos”, e mandatario a reitera.
