Rapport di IMF ta confirma cu Gabinete Wever-Croes a hiba un maneho financiero y economico responsabel

Xiomara Maduro ta satisfecho

ORANJESTAD (AAN): Recientemente IMF a publica su rapport di nan evaluacion financiero y economico di Aruba den nan Article IV Mission di nos Pais.

Den e ultimo rapport aki, IMF ta confirma cu Gabinete Wever-Croes a hiba un maneho financiero y economico responsabel. Si no tabata pa e pandemia, awe Aruba a conoce un surplus despues di 12 aña cu nos Pais a conoce solamente deficitnan.

Den su rapport, IMF ta verifica cu e maneho financiero y economico di Gobierno tabata bay den bon direccion. E caminda cu Gabinete Wever-Croes a scoge pa baha debe y traha riba diversificacion di economia tabata uno prudente y corecto.

A haci un trabao grandi pa baha un deficit cu a yega te na 444 miyon na aña 2012 na un surplus di 46 miyon Florin na aña 2020 promer cu Covid-19 a bati na porta di Aruba.

Aunke cu awor aki nos ta bolbe bay core algun aña cu deficit, Gabinete Wever-Croes a sa di traha un fundeshi fuerte pa Aruba su finanzas publico. Ta di spera cu pronto Aruba su economia por reactiva y cu nos por yega atrobe na nivelnan responsabel di deficit sigui atrobe pa surplus den un futuro cercano.

Esnan cu kier lesa e rapport por check e na:

www.bit.ly/aruba_IMF