ORANJESTAD (AAN): Na Aruba tambe, riba e fecha di 4 Mei: ta rindi honor na ‘Dodenherdenking’.
Tin di keda recorda tur esnan kendenan a haci sacrificionan grandi pa awe nos por ta liber.
Riba e fecha di 4 di mei, tur aña den Reino Hulandes ta conmemora esnan cu a fayece durante guera.
Diamars, tabata 76 aña cu e di dos guera mundial a finalisa. Ta recorda tur militar y ciudadanonan cu desde inicio di Segundo Guera Mundial a fayece. Y tambe ta duna honor na tur cu ta den guera of operacionnan pa paz actualmente.
Na e ocaciona di e fecha aki, Prome Minister ta encurasha e comunidad completo pa semper recorda tur e homber y muhenan kendenan a haci sacrificionan grandi pa awe nos por ta liber.
“Ta importante pa nos realisa con importante ta pa biba den paz. Pasobra nos no kier guera mas. Nos ta recorda tur esnan cu a lucha den guera, y e victimanan cu a perde nan bida den guera. No solamente di dos guera mundial, pero den tur guera,” Prome Ministro Evelyn Wever-Croes a bisa.
El a finaliza bisando: “Laga nos nunca lubida nan balentia y nan sacrificio pa nos libertad. Y e unico forma pa garantisa paz, ta di siña nos muchanan desde chikito, respet, tolerancia y empatia pa otronan. Esaki ta un responsabilidad di nos tur”.
