Rapport di Raad van State ta duna bon splicacion di poder den Reino
*Poder di Gobierno di Reino ta mara na Statuut y autonomia
*Ningun ciudadano ta mas cu otro den aplicacion di ley na Aruba
ORANJESTAD (AAN) — Ultimo tempo a bira cu ora un miembro di Parlamento no ta contento, e ta bishita Gobernador di Aruba.
Naturalemente ta pleno derecho di tur hende pa realisa un bishita na nos Gobernador, por ciento un Arubiano cu ta cumpli debidamente cu e tarea cu el a ricibi na un forma historico.
No por lubida cu ta un confiansa grandi Hulanda tabata tin den e actual gobernador di Aruba, cu no a wordo nombra segun e proceso costumbra cu ta permiti Gobierno di Aruba presenta candidato.
Ta pasobra Hulanda a nenga e candidatonan di Gobierno Mike Eman, cu segun Hulanda tabata demasiado family and friend, den un accion historico, Hulanda riba su mes a scoge e persona di nos Gobernador actual cu ta cumpli cu honor cu su tarea.
Si nos ta menciona e hecho cu ta acerca Gobernador, ta pasobra nos ta consciente di pasonan cu ta parce di kier haya un salida pa deshaci di e autonomia di Aruba cu ta hancra den gobernacion propio di e pais.
Den Parlamento Hulandes por nota chasco di cierto politiconan cu kier uza e cantidad di Hulandesnan cu a nace den region di Caribe, pa nan haya mas voto den eleccion. Nan no tin atencion pa asuntonan serio cu si nan mester tene na consideracion.
Nan kier uza asuntonan popular pa asina score. Ki peligro nan ta ocasiona, ta bini dilanti na Hulanda, caminda formacion di Gobierno ainda ta mal tranca pero tambe por mira cuanto hende ta muri y ta bira victima di falta di sentido civico di otro.
DIARIO semper a presenta su mes na fabor di un bon relacion entre Aruba y Hulanda pero esaki no por encera cu ta acepta loke no por.
Gobernacion na Hulanda ta un problema serio den loke ta bira un free for all, cu hopi bes ta pone hende puntra pakico ainda tin gobierno.
Hulanda su problema mester wordo resolve na Hulanda. Aruba su problema mester wordo resolve na Aruba, caminda ciudadanonan mester respeta ley sin distincion di persona.
Aruba conoce dos Gobierno na cierto forma. E gobierno cu directamente ta atende cu Aruba, ta e gobierno cu ta wordo eligi na urna electoral den eleccion liber mescos cu Hulanda y otro paisnan den Reino ta eligi nan Gobierno.
Ta cuatro pais autonomo tin den Reino Hulandes ademas di e islanan BES cu ta parti directo di Hulanda.
Gobierno di Hulanda pues por manda directamente na Hulanda y na islanan BES. Na Aruba, Gobierno di Aruba ta manda y ta tuma medidanan segun Ley basico na interes di e pueblo.
Si pa falta di Gobierno hende bira victima di un situacio, e ciudadano por hiba gobierno Huez. Gobierno di Aruba ta responsabel pa tur loke ta mishi cu bida y calidad di bida di e persona cu ta biba na Aruba.
Si un persona kier biba bou gobernante Hulandes, e mester bay biba na Hulanda cu no ta manda riba Gobierno di Aruba cu tin un relacion cu tur pais den Reino y pa medio di Corona ta parti di un Reino cu un Constitucion y tambe di e Conseho di Ministro di Reino cu ta atende asuntonan di Reino.
Na Aruba no por discrimina. Ningun hende ta mas cu otro y tur mester tene na ley cu mester cuida bida y bienestar di tur miembro di comunidad.
Un Polis mes mester tene su mes na ley. Ora un Polis no ta traha, por ehempel, e no por subi caya durante toque de queda cu rond mundo ta wordo aplica pa scapa bida di hende.
Aruba a lucha pa su Status Aparte. Uno y tur mester respeta Status Aparte, cu ta papia di un Gobierno autonomo como dirigente di un comunidad cu no por ta un free for all of un pais cu husticia di clase!
