Rabino Alberto Baruch a elabora tocante conmemoracion di Holocausto na Aruba

ORANJESTAD (AAN) – Rabino Alberto Baruch Zeilicovich, di Synagogue Beth Israel, a elabora den entrevista cu DIARIO, tocante e conmemoracion di Holocausto of “Yom Hashoa” na Idioma Hebreo.

E Holocausto ta nifica e asesinato di seis miyon Hudio na man di Alemania Nazi, entre nan un miyon di mucha, cual palabra berdadero ta “Genocidio.

Genocidio ta nifica eradica henter un pueblo of un nacion, for di e faz di tera. Esey ta loke e nazinan a purba di haci na e momento ey, eradica for di faz di tera e pueblo di Israel.

Aunke e hecho aki no tin comparacion cu e guera entre Rusia y Ukraine, locual si ta similar ta ora e soldatnan ta drenta tuma un ciudad y ta cuminza dispara y mata esnan civil. Esaki evidentemente, ta un odio racial, contra un pueblo, pero no ta exactamente Genocidio pa purba eradica e pueblo di Ukraine, pa disparce for di tera, pasobra e problema nan tine cu e pais, no cu nan hendenan.

Durante e acto di conmemoracion tabata presente Presidente di Parlamento, entre otro funcionarionan, y Rabino Baruch a expresa cu Aruba tin e mesun spirito cu Hulanda tin, pa e pueblo Hudio.

El a splica cu no ta casualidad cu e prome Synagogue den e Hemisferio Occidental, na 1654 ta e Synagogue cu ta na Curacao.

Tampoco ta casualidad cu den e Isla di Aruba, banda di un bunita estatua di Reina Wilhelmina, tin e estatua di un mucha Hudio asesina den e Holocausto door di e Alemannan Nazi: esta, un mucha Hulandes yama Anna Frank. Mi ta invita boso tur pa wak e estatua di e mucha aki, cu su mannan ata, y e inscripcion cu tin bao di dje, cu ta bisa: “ki maraviyoso lo tabata si e hendenan lo trata di haci un mundo miho”. El a reitera cu e spirito di Hulanda y e spirito di Aruba semper tabata y ta di keda pro e derechonan humano.

Finalmente, Rabino Alberto Baruch a comenta cu enberdad e comunidad Hudio na Aruba ta chikito, pero nan tin nan Synagogue unda nan ta haci e sirbishinan religioso, y tur ta bin hunto. Y tambe nan ta aporta pa e lugar unda nan ta biba biba ta un lugar unda tur hende por biba den paz, trankilidad, y husticia.