AZV cu serie di mensahe pa concientiza comunidad:
ORANJESTAD (AAN) – AZV a yama un conferencia di prensa, den cual a elabora riba un tema hopi importante pa cual a pidi concientizacion, na e comunidad.
E Relacionista Publico di AZV, señora Solange Tchong, a expresa cu esaki sigur tabata un dia importante pa AZV, unda nan kier a duna informacion tocante un tema conoci caba, cu ta e asina yama “BAZV”, pero treciendo esaki for di un otro angulo, of otro bista.
“Ta asina cu, cu e mensahe informa, ‘Abo a pidi bo recibo?’ nos di AZV kier concientiza y informa di e importancia di pidi recibo of haci e recomendacion eigenlijk, di tuma e recibo di BAZV, ora bo cumpra un producto of un servicio”, Solange Tjon a bisa.
Seguidamente, a duna un bista di e prome di un serie di grabacion cu ta bay sali, tocante e topico importante aki, den cual Janiro Eisden ta duna e mensahe pa pidi bo recibo di BAZV.
Manera ta conoci BAZV a worde introduci pa yuda y contribui na e fondo di AZV. Seguidamente Janiro Eisden a hiba palabra y a indica cu manera por a mira caba, e idea ta pa concientiza pueblo pa pidi e recibo pa worde registra, y asina contribui na e fondo di AZV via BAZV.
El a bisa cu e mes no tabata sa. Generalmente, e no ta tuma recibo ora e ta haci compra sea grandi of chikito. Locual e ta ripara ta cu den comercio nan ta puntra bo si bo kier bo recibo, pero no mester puntra, mester duna e cliente pasobra e ta su recibo.
Pesey ta bin un serie di mensahe pa concientiza pueblo pa tuma e recibo y pakico mester hacie. Esaki ta pa ta conciente cu tumando e recibo e persona ta contribui na e fondo di AZV.
