Proyecto “Poder di Hubentud” ta sigi empodera nos hobennan

ATHA

ORANJESTAD (AAN): ATHA ta concentra riba desaroya maneho y programa integral pa hobennan. Di e manera aki crea condicionnan pa por stimula y mehora participacion di hobennan den e area social y e forsa laboral. E vision ta pa ekipa tur hoben pa por haci uso optimal di nan potencial.  

E meta di e proyecto ta pa duna reconocimento na hobennan y empodera nan cu cursonan cu lo contribui pa motiva e hoben aki pa sigui progresa, sigui kere den su mes pero alabes e hoben aki lo ta un “role-model” pa otro hobennan.

Un grupo di 20 hoben y nan mayornan a bini hunto na oficina di ATHA na Dakota pa siña conoce mas di e contenido di e proyecto Poder di Hubentud 2025.

Durante e encuentro aki hobennan a ricibi e programa te cu December unda lo celebra e final di e projecto aki.

Durante 6 siman e hobennan cu for di July a sera conoci cu otro lo sigi e trajecto di liderasgo y teambuilding, dirigi pa profesionalnan den nos comunidad.

Cada proyecto lo mester tin un meta specifico dirigi na nos hobennan y mester ta uno sostenibel.

Proyecto mester tin calidadnan den dje manera, Social, Arte y Cultura, Educacion, Deporte, Trabao boluntario,  Innovacion, Comunicacion (Media y tecnologia).

Durante e encuentro hobennan a sera conoci cu e cordinadora di e projecto sra Elsa Krosendijk, cu for di 2014 a inicia e projecto aki “Poder di Hubentud”.  ATHA ta sumamente agradecido pa e acceptacion di sra Krosendijk di tey bek y pa por comparti su conocemento den e projecto aki hunto cu Jhon Freddie Montoya di DCA, Directora di ATHA sra Franchesca Heinze y e comicion di ehecucion.

Durante un periode di 2 luna lo ekipa e hobennan cu diferente workshops y lo dirigi nan con pa traha, ehecuta, documenta y presenta nan projecto.

Un bunita momento tabata ora e prome ganador di Poder di Hubentud sr Aldrich Dijkhoff a duna su testimonio di kico Poder di Hubentud a nifica pe. Segun Dijkhoff ; “Mi a reconoce awo, como un adulto, cu mi evolucion como ser humano hoben pa uno responsabel a cuminsa for di e temporada ey y mi ta mira te cu mi a crece dor di e  preparacion aki, prome lugar como coach di muchanan chikito, sinti mi potencial pa bira educador pero no a logra y e la reparami mihor como profesional.

Mas cu tur cos pasando den mi evolucion e programa a yuda preparami mas ainda como mayor di mi yiu muhe. Mi kier encuarsha boso como hobennan di awendia, pa absorba tur locual ta wordo duna na boso den e cursonan, charlanan, paso esey ta e yabi cu lo habri boso porta di exito den futuro, elo tin un mihor preparacion pa bo futuro hunto cu bo educacion na scol. Mi semper tey pa duna cualkier conseho of guia.”

Despues di esaki e hobennan a ricibi 10 minuut di tempo pa hunto cu nan mayornan tuma e decision di sigi den e projecto bunita aki. Bou di hubilo y aplauso a puntra cada un si nan ta sigi di cual 1 a bisa cu pe lo ta dificil e resto (20) a accepta e reto.

ATHA ta  preparando tambe momentonan special di documentacion  di e evento y proyectonan, cu pronto lo por mira riba social media pa partnernan di Djies pa Hari. Segun e programa sigi lo publica e desaroyo di nos hobennan.