Gobierno di Aruba ta pone gran balor riba e relacion strategico cu Royal Schiphol Group

Prome Minister Mike Eman

ORANJESTAD (AAN): Diaranson mainta, Prome Minister di Aruba, mr. Mike Eman, a sostene un encuentro importante na Hulanda cu e ehecutivo mas halto di Royal Schiphol Group, sr. Pieter van Oord.

Den e reunion, a discuti e posibilidadnan pa amplia y fortifica e colaboracion strategico cu Aruba. Schiphol Group a expresa su compromiso pa yuda desaroya un relacion mas profundo cu islanan di Caribe, compartiendo nan experticio den maneho y desaroyo di aeropuerto.

Segun sr. Van Oord, Aruba ta un partner clave, y e pasado cu Schiphol a mustra cu a logra hopi exito transformando Aeropuerto Internacional Reina Beatrix como un organisacion stabiel y confiabel. Esaki ta duna un base firme pa un colaboracion strategico mas amplio.

E plan pa futuro ta inclui no solamente e intercambio di conocemento y experencia, pero tambe pa prepara y forma talento hoben di Aruba na Hulanda. Schiphol mes a expresa su interes pa eventualmente considera un participacion minoritario den aeropuerto di Aruba, cu lo fortifica e aliansa strategico.

Premier Mike Eman a enfatisa cu Gobierno di Aruba ta pone gran balor riba e relacion strategico cu Royal Schiphol Group. Aruba tin mester di aliansa strategico cu partnernan internacional cu ta brinda conocemento, innovacion y sostenibilidad. Schiphol ta un partner cu ya a demostra su mes, y gobierno ta wak cu optimismo riba e paso nobo pa fortalece nos aeropuerto y posicion di Aruba den region aun mas.

E reunion ta confirma e compromiso di Gobierno di Aruba pa sigui traha riba infrastructura critico pa pueblo y economia di Aruba, sigurando cu nos aeropuerto ta keda un centro regional fuerte y sostenibel.