Kiwanis Club of Palm Beach ta recorda Robert Jeand’or

ORANJESTAD (AAN): Memey di añanan 2000, Kiwanis Club of Palm Beach a acerca Robert y su Solo Banda Show pa bira parti di nos “Masquerade Carnaval Party”,

nos fiesta pa recauda fondo, cu na e momento ey ainda tabata pasando den un proceso di desaroyo. Un di nos miembronan a acerca Robert mientras e tabata presentando na un otro evento, cu e pregunta: “Nos tin mester subi nivel di e fiesta, bo kier ta parti di esaki?” Sin pensa dos biaha, Robert a bisa si.

Locual nos no tabata sa e tempo ey, ta cu e colaboracion, entre Kiwanis Club of Palm Beach Masquerade Party y Robert y su Solo Banda Show, lo keda pa historia. E evento aki a sigui crece durante e ultimo 20 aña, y ta e fiesta di recaudacion di fondo, di mas grandi na Aruba. Robert su aporte, no tawata solamente como banda, sino den tur sentido: su preparacion, su consehonan pa setnan y por ultimo su repertorio sin igual. Aña tras aña, e comite organizador, tabata consulta Robert pa ideanan nobo y asina Robert a yuda nos innova. Robert nunca a falta un conferencia di prensa, tampoco un reunion di banda; semper presente. Despues, nos tabata keda papia oranan largo tocante e fiesta, musica di carnaval, festivalnan y sin keda afo, su experiencianan den e mercado Internacional, pero en especial na Republica Dominicana. Anto, prome cu e fiesta, pa percura pa presenta un set di calidad halto, e yamadanan telefonico tabata garantisa.

Robert tabata un musico cu un profesionalismo enorme, cu un wowo pa detaye y un perfeccionista cu tabata refleha den cada un di su presentacionnan. Pero, mas cu claro, locual Robert tabata semper orguyoso di dje, ta e hecho cu su banda tabata 100% bibo, pues sin haci uso di aparatonan, computer y/of otro sistema tecnologico, cu ta pone su banda presenta un zonido musical imcomparabel.

Aunke cu tabata significa oficialmente “trabou”, pa Robert e fiesta tabata tin un significacion mas profundo. Robert tabata sa locual Kiwanis Club of Palm Beach ta representa pa e comunidad di Aruba, y hopi biaha e tabata cubri gastonan adicional, pa asina percura pa e presenta un show di calidad cu artistanan invita, entre otro: Ataniro y Mighty Campo. Y sin lubida su yiu Robertico, cu no ta biba na Aruba pero cu no ta perde un fiesta tocando timbal hunto cu e banda y Anoushka, formando parti integral di e coro pa varios aña. Si e no ta cantando, e ta den publico gozando hunto cu e banda y e controntribyentenan.

Con nos por lubida e momentonan ora tur hende riba pista ta canta y grita:

“Si aki ta pariba, aya ta pabou… ban pariba, ban pariba… ban pabou, ban pabou…cu mi Bolobonchi”. E ultimo aki tabata wordo complementa cu e clasico di “Los Laga Bai”: “abou, abou, nos ta bai abou… ban ariba, Los’e”, cu tabata yena e pista di baile completamente yen, mientras cu tur hende ta zwaai cu nan “glow in the dark foam- stick” den nan man.

Ta imposibel imagina un Masquerade Party sin Robert Jeand’or. Pero nos ta confia cu su legado lo sigui biba: su musica ta inmortalisa, su compromiso y lealtad lo keda honra y recorda pa semper. Robert tabata un persona di oro y un amigo stima pa hopi miembronan di Kiwanis Club of Palm Beach, specialmente miembronan di e comite organizador: Patrick Melchiors, Rossi Marchena y Chejito Croes.

Robert, masha danki pa bo contribucion, bo musica y tur e bon recuerdonan. Cu Papa Dios duna bo Descanso Eterno, y cu bo spirito energetico y bo ritmo contagioso keda resona pa semper.

Kiwanis Club of Palm Beach ta pertenece na e organizacion global Kiwanis Internacional cu ta  un  instancia caritativo dedica na  haci nos mundo mihor door di cambia un comunidad pa medio di un mucha cada bez.