Prome bishita oficial di Club Med 2 na Aruba

ORANJESTAD (AAN): Den fin di siman cu a pasa, e crusero ‘Club Med 2’ a haci su prome bishita oficial na Aruba.  Club Med 2 tabata mara na Waf di Playa for di 8:00 am te cu 6:00 pm.

   Specialmente pa e ocasion aki, invitadonan di Aruba Tourism Authority (ATA), Aruba Ports Authority, y agente SEL Maduro & Sons tabata presente pa duna e capitan y staf un bon bini.

   Esnan local a haci entrega di plaquette y regalo pa conmemora e ocasion aki.  Na e ocasion aki, Cruise Manager di ATA, esta Monica Bos, a entrega un bunita pintura di un cas tipico di Aruba produci pa artista local, na capitan.

   Club Med 2 ta un barco luhoso pa crusero, cu tin 5 mast grandi di bela, cu ta ofrece amenidadnan cu experiencia sin paralelo.

   E barco aki construi na Francia, a cuminsa nabega na 1996, y tin capacidad di 386 pasahero.  E ta uno completamente controla pa computer, y tin dos motor Diesel Electric y tur bela cu wordo hisa ta controla door di computer.