Ministro Arends impresiona cu charging station instala na Hilton

Pa carga auto electrico

ORANJESTAD (AAN): E siman aki Minister di Transporte, Sr. Ursell Arends tabata invitado pa inaugura e stacion di carga pa auto electrico na Hilton Aruba. Un iniciativa di sector priva pero cu ta marca un momento clave den promocion di energia limpi y uzo di vehiculo electrico ariba nos isla.

   Minister Arends a worde ricibi door di e Larry Tuck, Gerente General di Hilton Aruba y Reinier Kooi Gerente General di Avis, Budget, Payless kendenan a duna e mandatario splicacion amplio di e esfuersonan di nan compania pa un direccion mas sostenibel.

   E stacion di carga yama 'D-Point' ta worde poni disponibel pa dos espacio di parkeo cu ta ekipa cu e infrastructura necesario pa por carga e bateria di un auto electrico. Roel van Amerongen, Gerente di Compras di Dynaf kende ta proveedor di e stacion di carga a duna di conoce cu e ta ful automatico y a duna demonstracion di con pa uz'e. E adicion aki ta bin despues cu diferente companianan cu ta huur auto a opta pa reemplasa algun di nan vehiculonan pa asina yama 'EV (Electric Vehicle) cars'. Pues e instalacion di e stacion di carga lo facilita e uzo y huurmento di e autonan aki entre turistanan.

   Minister Arends ta brinda su apoyo na e iniciativa di accesibilidad na stacionnan di carga pa autonan electrico mirando cu e ta aporta y cuadra na locual su maneho encuanto transporte y medio ambiente ta purba di logra. E maneho pa transporte publico lo ser publica prome cu fin di aña y ta dirigi riba  promove mobilidad, garantisa un transporte publico sigur, husto, accesibel y duradero.