Evelyn Ras-Yarzagaray di Fundacion Famia Planea:
ORANJESTAD (AAN)-- Evelyn Ras-Yarzagaray, di Fundacion Famia Planea, den un entrevista cu DIARIO a referi na locual 53 aña di existencia di e Fundacion ta nifica.
Pa Famia Planea, 53 aña ta nifica hopi. E ta un di e organizacionnan di mas edad na Aruba, trahando riba salud sexual y reproductivo di nos comunidad.
“Nos a bin ta wak hopi renovacion, nos a bin ta traha riba nos servicionan, nos imagen y con nos por empodera y ta mas cerca di nos comunidad. Esey nos a bin ta haci tambe door di incorpora e parti di tecnologia den nos trabao, y asina nos tin hopi servicio digital y tambe, eigenlijk, cu bo por sinti e cambio den tur caminda, den e progreso tambe di nos trabao, di servicio y di locual ta maneho, staf y famia planea mes: e lugar, e imagen di ora cu bo drenta, con bo ta sinti den e oficina pa nos por sirbi bo miho cu ta posible”, Evelyn Ras a señala.
Evelyn Ras a señala cu, naturalmente, semper tin reto. “Si bay bek na añanan 70 te aworaki, esey a duna bo oportunidad pa crece, oportunidadnan pa bo analiza bo mes, y pa por wak unda bo ta, di unda bo ta bin, y unda bo kier bay. Semper keda hopi critico tambe di wak bo mes como organizacion, no solamente kico bo ta haci pero tambe ki impacto bo tin den bo comunidad tambe. Analiza bo cifranan, y e parti di si ‘mi ta logrando mi metanan’ kico mas mi tin cu pone como obhetivo pa mi por logra cu e organizacion”, Ras a relata.
El a sigui bisa cu e organizacion ta relativamente chikito, na comienzo el a draai cu cuater trahado, di aña 70 te aworaki y Evelyn Ras ta kere cu nan mester wak bek, ya cu nan ta cerando cu casi 20 mil cliente pa aña. “Esey bo ta wak tambe e impacto cu, eigenlijk, sexualidad tin na Aruba. “E no tabata asina semper, vooral na comienzo, pero aworaki nos ta contento di por clausura 2023 y evalua tambe con esaki a bay, y kico ta e impacto pa e aña aki. Pero mi ta sigur cu nos ta yegando e 20 mil clientenan. Nos a cera aña pasa cu 17 mil plus, y esey ta pone cu, naturalmente, bo ta hopi mas critico riba bo mes tambe, cual ta e productonan cu bo ta provee y pa bo scucha bo clientela un tiki mas miho. Kico falta y unda mester mehora”, Evelyn Ras-Yarzagaray a señala.
