Programa pa Un Bon Comienso di Aña 2024 na Biblioteca Nacional Aruba

ORANJESTAD (AAN):  Diaranson, 10 di januari 2024 di 6.30 p.m. pa 9.00 p.m. lo presenta e prome actividad pa aña 2024 na Biblioteca Nacional Aruba, George Madurostraat 13, Oranjestad.

            Gestor Cultural Mirto Laclé conhuntamente cu Biblioteca Nacional Aruba y Departamento di Cultura Aruba lo organisa un anochi cu un programa multidisciplinario Pa Un Bon Comienso di Aña 2024.

            E anochi lo consisti di un programa cu actividadnan integra, esta musica, canto, baile, charla y presentacion.

Como invitadonan special lo tin:

-Mr. Joyce Overdijk-Francis

-Ilustrado Vanessa Paulina

-Sra. Paula Engelen

-Grupo di Dande pa desea tur presente Un prospero Aña 2024

Sra. Joyce Overdijk-Francis lo elabora riba algun aspecto manera:

E tempo colonial y desaroyonan di Structura Estatal,

Sclabitud Trans-Atlantico/ Middle Passage,

Resistencia, Libertad, Reconocimento,

E historia Comun, Museo di Sclabitud.

            Vanessa Paulina lo presenta su trabou como ilustrado di e buki Virginia e rebelde di Aruba. E buki ta conta e storia di Virginia, e rebelde di Aruba. Con e ta lucha pa su libertad y ta resisti contra opresion di su doño. Un storia di rebeldia, di resistencia y lucha contra inhusticia.

            E obra Virginia, e rebelde di Aruba a keda produci pa escritor Jeroen Hoogerwerf y ilustrado Vanessa Paulina den cooperacion cu UNOCA y Biblioteca Nacional Aruba.

            Sra. Paula Engelen lo duna un presentacion di e diferente shownan cultural musical cu el a yega di presenta como MC, Host, Event Organizer y PR music, y aki  en particular musica di Famia Connor en general.

            Lo tin presentacion di Grupo di Dande y Rey y Reina di Dande.

Laga nos bin hunto , disfruta y celebra. Entrada pa e anochi aki ta gratis.