Oficialnan di Turismo y Waf a duna Norwegian Viva un bon bini

ORANJESTAD (AAN): Aña 2024 a habri bon pa Aruba, ora cu ya riba Diamars, e barco ‘Norwegian Viva’ a haci un bishita oficial.

   Manera DIARIO a anuncia caba den su edicion anterior, Aruba a celebra e momento di bishita oficial aki, y pesey oficialnan di Aruba Tourism Authority, Aruba Ports Authority, agencia SEL Maduro & Sons tabata presente pa conmemora e evento.

   Esaki a bay combina cu e tradicional entrega di plaquette y regalo, pa simbolisa e unidad y colaboracion entre Norwegian Cruise Lines y Aruba como destinacion di crusero.

   Cruise Manager, Monica Bos di Aruba Tourism Authority, a presenta un obra di arte crea pa artistanan local, incluyendo un texto di bon bini na Capitan di Norwegian Viva, y esaki na nomber di Gobierno, di ATA, y di comunidad.

   E gesto simbolico aki a reconoce e bishita oficial di e barco pa prome biaha, y a expresa gratitud di a escoge Aruba como destinacion.  Manera DIARIO a publica, apenas na Augustus aña pasa e barco aki a cuminsa nabega.

   Tabata presente tambe CEo di Aruba Ports Authority, Marc Figaroa, y oficialnan di SEL Maduro & Sons, y nan tambe a presenta plaquette na e capitan.

   Aruba Tourism Authority ta sigui anticipa mas cooperacion cu Norwegian Cruise Lines, cu lo yuda contribui na crecimento di turismo crusero den e region, pa tende di e beyesa inigualable y hospitalidad cu Aruba ta ofrece.