ORANJESTAD(AAN): Den un entrevista cu presidente di SMAC Darren van Ommeren, el a splica cu e intencion e aña aki ta pa haci uso di Aruba Entertainment Center (AEC) pa varios actividad,.
“Nos ta bay uza Aruba Entertainment Center pa e festivalnan di tumba infantil y hubenil, Calypso y Roadmarch infantil y hubenil, reina infantil y hubenil y tambe reina grandi y señora Carnaval ta tuma lugar den AEC”.
Prins cu Pancho e aña aki ta bay pa Centro di Bario Brazil, segun van Ommeren.
El a splica cu riba plaza Betico Croes no por tin actividad, debi na e hecho cu tin bisiñanan cu a keha for di aña pasa.
“Nos a busca otro opcion y pesey Prins y Pancho ta bay tuma lugar Diadomingo awor na Centro di Bario Brazil”.
Porta ta habri 6’or di atardi y e actividad ta cuminza oficialmente pa 6 or y mey.
Ta bay tin trekmento di lot tambe pa e eleccion di reina den tur 4 categoria, segun e presidente di SMAC.
El a splica cu entrada pa Prins y Pancho ta gratis, mientras cu e Parada di Flambeu ta bay ta Diasabra y ta sali for di Avenida Milo Croes pa 8’or en punto y lo mester termina na altura di Wendy’s Boulevard pa alrededor di 2’or pa 2’or y mey di marduga.
