Prensa di Aruba invita pa celebra e prome aniversario di 'Campeones' na Marriot Aruba Ocean Club

ORANJESTAD  (AAN):  Parce cu tabata ayera ora cu 'Campeones Cantina & Tequila Bar' a habri na Marriott Aruba Ocean Club. Pa celebra su aniversario a invita prensa di Aruba pa asina disfruta hunto di e tremendo ocasion aki.

            E miembronan di prensa, manera ta custumber, a sinti nan mes na cas ora ta trata di atende cu e invitacionnan pa diferente di e eventonan magnifico cu e ehecutivonan di marketing di e Marriott Complex ta organisa.

            Tessa Trejo, Marketing Executive na Aruba Marriott a duna di conoce cu esaki ta un ocasion hopi emocionante pa nan tambe na 'Campeones' celebrando un aña caba di existencia.

            Ta trata sigur di un restaurant cu a crece y cu a trece un tiki di e ambiente mexicano aki na Aruba. "Asina cu bo drenta ta un lugar asina magico. Tambe e cumindanan ta inspira den Mexico y tambe e bebidanan".

            Por mira esaki como un aña hopi exitoso, Tessa Trejo a expresa.

            Y mas cu claro, el a invita tur local na Aruba pa pasa 'Campeones' unda lo ricibi tur dia un 15% di descuento. E hende local sigur ta nan prioridad, a bisa.

            Durante e tremendo anochi aki, e invitadonan special, esta prensa, a gosa di e musica alegre di mariachi Reyes di  Aruba y indiscutiblemente di un mix di algun di e specialidadnan di  'Campeones' manera 'Baja Fish Taco' cua ta un delicia, fish ceviche, shrimp cevice, tacos dorados, al pastor chicken tacos, entre otro. Tur esaki acompaña pa un exkisito Margarita. Na fnal, prensa tambe a disfruta di un dushi dessert manera churritos y taco di chuculati.

            Un pabien na Chef Natasja Moya, kende actualmente ta encarga cu henter e menu di 'Campeones' y na henter staff pa nan tremendo dedicacion.