WASHINGTON: Riba Diabierna cu hopi tristesa, Pan American Health Organization (PAHO) a informa cu Director Emeritus Dr. Carissa F. Etienne a fayece.
Dr. Carissa Etienne, kende ta procedente di e isla di Dominica, a sirbi como Director di PAHO y Director Regional di World Health Organization (WHO) pa Americas di Februari 2013 te cu Januari 2023.
“Carissa tabata un gran amiga y colega, y bao di su liderato stabil y guia, PAHO a sa di obtene logronan significante pa e region di Americas, hasta ora cu a enfrenta un di e retonan mas grandi di salud publico cu Covid-19,” ta loke Director di PAHO, Dr. Jarbas Barbosa a bisa. “Mi ta hopi tristo cu su fayecimento, y mi pensamentonan ta bay cu su famia, amigo, y tur di nos na PAHO cu tabatin semper gran aprecio pe.”
Durante cu e tabata ocupa e puesto, Dr. Etienne a logra di guia PAHO su reaccion pa e pandemia sin precedente di Covid-19 den region Americano, como tambe e esfuerso pa controla e epidemianan di Zika y Chikungunya, y tambe brotenan di cholera y keintura geel na Haiti y Brasil, mientras cu na forma significativo a mehora e reaccion di e organisacion pa emergencia y desastrenan dentro di 48 ora.
Bao di liderato di Dr. Etienne, tur pais den continente Americano a elimina e transmision endemico di sarampi, rubella, y sindrome di rubella congenital, y a haci logronan considerable den e prevencion y control di malesanan cronico no-comunicable. Mecanismonan legislativo y regulatorio a obtene traccion, mientras cu paisnan a bin cu leynan pa cu ponemento di etiketanan mas informativo riba productonan di cuminda, y a introduci impuesto extra riba bebidanan traha cu sucu.
Dr. Etienne a ricibi su grado medico (Bachelor of Medicine, Bachelor of Surgery MBBS) di University of the West Indies na Jamaica, y tambe su Master of Science den Community Health in Developing Countries for di London School of Hygiene and Tropical Medicine, na University of London.
