Gabriel Marchena, Trahado Social di FPNC:
*Incluso tin pensionado cu nan entrada no ta yega cubri alimentacion basico
ORANJESTAD (AAN) – Gabriel Marchena, Trahado Social di Fundacion Pa Nos Comunidad, a menciona den entrevista cu DIARIO, cu nan ta zorg principalmente pa haya comestible pa nan clientenan, y tambe e parti monetario, teniendo cuenta cu e situacion financiero di hopi hende a cambia.
Pesey FPNC ta contento cu nan ta hayando un gran apoyo den e proyecto di forma cu cualkier comerciante cu kier habri su curazon pa yuda, tambe ta bon bini pa sigui join.
“Pasobra, atrobe, hunto cu mi comunidad nos ta haci un diferencia den e bida di e famianan den necesidad, locual ta hopi importante, pasobra hopi biaha tin muchanan den e constelacion”, Marchena a señala, agregando cu importante ta tambe, cu nan a pone coi hunga tambe nan a pone cu, eigenlijk, comunidad tambe por deposita coi hunga pa mucha den e Donation Box. Otro articulonan cu tambe por wordo duna ta productonan sanitario.
“Por pensa tambe riba wipes, baby powder, di manera cu por ofrece e famia algo mas completo. Actualmente, nos meta ta sigui yuda e 350 famianan cu ta registra cerca nos pa ayudo, cu ta clientenan cu nos tin haci tempo y cu nos ta wak cu nan situacion tambe ta uno cu no ta cambia di biaha. Tin di nan ta envolvi den problema di salud, malesa cronico, y tin cu a wordo declara cu incapacidad pa traha, y esnan cu ta haya bijstand tambe cu nan entrada no ta cambia mucho, ademas di pensionadonan cu nos sa cu aworaki nan pension no ta yegando, di manera cu no ta resta entrada pa cubri alimentonan basico”, Marchena a subraya.
El a agrega cu cada bez ta drenta peticionnan nobo, y e ta keda subi. Tambe tin clientenan cu mester di un ayudo un tiki mas largo, y cu un evaluacion di nan situacion FPNC por prolonga nan yudanza atrobe. “Cada situacion ta diferente y mester tene cuenta tambe cu e parti di salud, e parti financiero, y tambe e problemanan social cu por stroba e persona pa tin control riba su entrada”, Gabriel Marchena a relata.
