"Por spera cu mi lo ta critico y analitico den Parlamento"

Raymicheline Raymond: -  ORANJESTAD (AAN): Despues cu e credencialnan di 8 parlamentario nobo a wordo aproba Diahuebs, e parlamentarionan Diabierna mainta a huramenta na Cas di Gobernador.

Despues cu nan a huramenta, prensa a logra papia cu e representantenan di pueblo.

Parlamentario Raymicheline Raymond di partido RAIZ a bisa cu e ta cla pa traha.

“Nos ta cla pa haci nos trabao na un manera integra,  responsabel y transparente, manera nos a bisa durante campaña”.

Nos ta bay traha a base di locual nos a campaña pe y nos a wordo eligi pe esta controla Gobierno, segun Raymond.

El a bisa cu intencion ta pa e parlamentarionan haci nan trabao debidamente, pa henter pueblo di Aruba por beneficia di esaki.

Pa locual por wordo spera di dje den Parlamento, Raymond a bisa cu por spera cu e ta bay ta hopi critico y analitico, mientras cu ta bay busca maneranan pa hiba nos pais dilanti.

“Pami no tin ningun diferencia, Gobierno ta Gobierno y nos tin cu bay haci nos trabao na e momento aki”, segun e parlamentario.

Pa loke ta e retonan grandi riba e tereno financiero y social, e parlamentario a indica cu esey ta hustamente locual el a basa su campaña riba dje, esta ‘Welvaart en Welzijn’ .

“Mi sa cu nos tin cu bay dilanti y nos tin cu recupera nos economia, pero nos no por laga nos hendenan atras pa loke ta nan salud mental y nan bienestar en general”.

Mi ta ansioso pa wak cua plannan tin y kico tur ta bay wordo treci dilanti, pa corda Gobierno cu nos hendenan ta esunnan cu tambe mester bin prome, segun Raymond.