ORANJESTAD (AAN): Raymond Kamperveen ta un di e parlamentarionan nobo cu a huramenta Diabierna na Cas di Gobernador, como miembro di partido RAIZ.
Despues di su salida DIARIO a entrevista e ex empleado di Servicio di Impuesto. Kamperveen a indica cu e huramentacion tabata un experiencia unico.
“Den bida como un persona cu semper a traha pa pais Aruba via mi trabao, awor mi funcion como parlamentario ta un emocion grandi pami y un privilegio pa haya e oportunidad aki”, segun Kamperveen.
DIARIO a puntra e parlamentario si for di basta aña e tabata tin pensa di purba yega Parlamento.
El a splica cu den pasado e tabata tin e pensamento pa quizas subi un lista y 2017 el a dicidi di drenta RAIZ pa traha pa Aruba.
“Mi deseo e ora ey a crece pa bira un parlamentario y awe mi soño a bira un realidad”, segun e parlamentario nobo. Pa loke e areanan cu sigur e lo enfoca riba dje Kamperveen a bisa cu sigur e lo traha riba e parti di finanzas, belasting, deporte, e parti social y hobennan.
Banda di esaki el a splica cu e ta hopi interesa den pa bienestar di nos adultonan mayor.
