Perspectivanan Invisibel ta invita tur hende pa nan Open Studio na FAVI Aruba

ORANJESTAD (AAN):  Aruba Plataforma Aruba ta anuncia e prome Open Studio di e programa inclusivo Perspectivanan Invisibel

cu lo tuma luga Diabierna 12 di december, di 5:00 p.m. te 8:00 p.m. na edificio di FAVI Aruba.

Durante e anochi, 10 studiante ciego of cu bista limita lo presenta algun fotografianan cu nan a crea durante e prome modulo di e programa aki. E obra ta refleha nan personalidad, nan creatividad, y nan manera personal di “mira” arte via sonido, tacto y experiencia.

Un evento pa honra inclusion y creatividad Perspectivanan Invisibel ta un iniciativa di Plataforma Aruba, den colaboracion cu FAVI Aruba, cu ta traha pa ofrece arte accesibel pa tur hende, inclusivamente hende ciego of cu bista limita.

E Open Studio ta habri su porta pa famia, amigonan y comunidad pa siña tokante e proceso, e metodologia y e poder di expresion sin limitacion. E evento ta posibel danki na tur esnan cu a contribui den manera diferente pa asina por presenta e trabounan cu profesionalismo y amor.

Detayenan di e evento FAVI Aruba Diabierna 12 di December 5:00 p.m. – 8:00 p.m. Entrada ta gratis y tur ta bonbini. Ta invita tur hende pa yega, apoya, y celebra e trabaonan di e creativonan cu limitacion visual.