Tanki nobo di awa na Alto Vista a wordo inaugura

Modernisacion ta mantene nos na vanguardia:

ORANJESTAD (AAN): Gobierno di Aruba, pa medio di Minister encarga cu Energia, mr. drs. Arthur Dowers, hunto cu WEB Aruba y partner tecnico Florida Aqua Store, a inaugura oficialmente e tanki di awa nobo na Alto Vista, un instalacion vital pa garantisa un suministro di awa confiabel y di calidad halto pa area do Noord y e sector turistico.

   “Nos tin experticio, nos tin un manera di traha solido, y nos ta riba e caminda corecto pa garantisa awa confiabel pa tur generacion,” Minister Dowers a bisa.

   Un proyecto miyonario pa fortifica suministro:  Den su discurso, Minister Dowers a enfatisa cu Aruba ta trahando firmamente pa modernisa su infrastructura pa red di sistema di awa:

   “E importancia di un tanki manera esaki ta pa garantisa awa di calidad halto cu por yega sin interupcion na tur cas y tambe na nos sector turistico. Nos mester ta prepara pa futuro, pa demanda cu ta crece, y pa desafio climatico.”

   E minister tambe a gradici WEB Aruba pa su consistencia y profesionalismo den un proceso tecnico cu no tabata sin reto.

   Progreso y reto tecnico supera cu exito: WEB Aruba a splica cu e tanki nobo, traha di glass-fused-to-steel y cu un capacidad di 18.800 m³ (6.500 m³ mas grandi cu esun bieu), tabata un proyecto desafiante.
Durante 2024 progreso tabata fuerte, pero ora cu tabata cla pa yena, lekkage den e fundeshi di beton a surgi.

   Despues di investigashon, a tuma un decision tecnico fundamental: reemplasa completamente e fundeshi pa un sistema di staal, un solucion moderno y duradero.
   Minister Dowers a elogia e “tremendo teamwork” cu a permiti cu e tanki nobo finalment te drenta den operacion den manera sigur.

   Apreciacion pa e comunidad di Alto Vista: Minister Dowers y WEB Aruba a gradici e habitantenan di Alto Vista pa nan pasenshi durante e trabaonan. Como muestra di aprecio, WEB a haci donacion di un conexion di awa gratis na Kapel di Alto Vista pa sostene e toiletnan.

   Modernisacion continua di Aruba su red di awa: Minister Dowers a confirma cu e programa “Upgrade Aruba Water Distribution Network” ta sigui: (*) Reemplaso di tankinan di Jaburibari y Urataka. (*) Construccion di un tanki nobo na Juana Morto.