Personal di Arugas a yama ayo na su director actual Roberto Geerman y yama bon bini na Paul Arends

Durante evento “Beyond Gas” --- ORANJESTAD (AAN) --  Diabierna ultimo, dia 29 di October a marca e comienzo di un era nobo pa Arugas.

E compania, cu ya ta existi pa 80 aña, a tene un evento festivo cu su empleadonan pa asina yama ayo na e director actual, Roberto Geerman y yama bon bini na su director nobo Paul Arends. Roberto Geerman cu tin riba 40 aña di servicio a lidera e compania pa mas di 25 aña y a sa di establece Arugas como un compania fuerte y resiliente.

“Mi ta bay tin sapatonan grandi pa yena”, tabata palabranan di Paul Arends durante su speech pa tur esnan presente.

Sin embargo, Paul ta sinti’e cla pa e reto nobo aki pasobra Roberto tabata un guia ehemplar y a prepar’e pa e por hiba Arugas na e siguiente nivel. Jan Harsveld, director di Bonick Gas & Oil Terminal, tambe a hiba palabra y a conta di momentonan ameno y proyectonan grandi cu a keda ehecuta durante e trayectoria di Roberto na Arugas.

Jan no por a keda sin menciona con Roberto tabata keda traha te oranan laat di marduga pa asina sigura cu tur cos ta cana manera mester ta den e compania. Segun Roberto: “Arugas tabata y semper lo ta mi di dos cas”.

Tur empleado di Arugas ta bay haya Roberto, miho conoci como Robby, pa tur na Arugas, su falta masha hopi mes. E tabata un director cu a stima su trabao y e team di Arugas completo. Y awor e ta bay goza di un pension bon mereci. Den palabranan di Frendsel Giel, cu ta presidente di e hunta di supervision di Arugas, Holding N.V. “Maske cu no ta awor, inmediatamente, Robby ta bay goza di su pension pasobra ainda nos mester di su conocemento y experticio, den futuro cercano si lo yega ora pa Robby goza manera mester ta, hunto cu su famia”.

E evento tabata e oportunidad perfecto tambe pa Arugas hunto cu su hunta di supervision, introduci su logo nobo na tur empleado y invitado presente, develando un letrero nobo na su edificio principal. Un logo cu ta e simbolo di loke Arugas tin proponi pa logra den e siguiente periodo su dilanti.

Un Arugas profesional y moderno cu semper lo tey pa su clientenan y awor moviendo den un direccion nobo. “Arugas ta bayendo Beyond Gas!” Usando palabranan di su director saliente Roberto Geerman, “Despues di 80 aña, esaki ta solamente e comienzo”