Minister Presidente Wever-Croes: --- ORANJESTAD (AAN) – Den e contexto di CAft, Prome Minister a sigui bisa, den conferencia di prensa, cu aunke nos turismo ta bayendo bon, Aruba su economia a cuminza crece, nos pais no ta ainda caminda cu mester ta.
“Ni turismo mes a yega ainda na e nivel cu e tabata prome cu e pandemia. Si tur cos ta bay manera nos ta premira pa fin di aña nos turismo lo recupera na 70 pa 75% di e nivel cu e tabata prome cu e pandemia. Kiermen, no 100%. E ta bay bon compara cu otro pais pero, atrobe, e no a yega 100% ainda”, e dignatario a remarca.
E dignatario a bisa cu un bez cu turismo yega 100% di e nivel cu e tabata prome cu e pandemia, cu ta otro aña, despues di esey Aruba su economia lo bin bek na e nivel cu e tabata, y ta hopi despues atrobe, e finanzanan ta bay yega na e nivel ey.
Minister Presidente a reitera: “Pues, apesar cu turismo ta bayendo bon, apesar cu e economia a cuminza lanta atrobe, financieramente Aruba ta, keto bay, den e mesun problemanan sumamente dificil cu nos tabata tin durante di e pandemia. E problemanan financiero, no a pasa!”
Wever-Croes a indica cu otro area cu tin problemanan tambe, ta gasto di salud. “Akinan nos por a scucha CAft, un biaha mas, keda teima riba e tema di 60 miyon florin, pero pa nos ta hopi honesto nos tambe sa cu e gastonan di salud, manera nan ta awo, no por continua, pasobra si no, aki dos of tres aña nos ta haya nos mes sea ta hisa primanan of baha e pakete. Bo tin cu tuma un decision si no bo ta perde full e AZV y esey ta haci hopi mas daño na henter nos comunidad”, Prome Minister a señala.
Minister Presidente a bisa cu gobierno ta trahando awor riba un “plan van aanpak” con nan ta bay atende cu e gastonan di salubridad, riba termino cortico, mediano y mas largo.
E dignatario a indica cu un di tres area di preocupacion cu CAft tambe a menciona, ta gastonan di personal di gobierno. “CAft ta bisa cu nan ta haya cu nos mester baha esakinan, y el a menciona specificamente overtime, cu ta demasiado halto na Aruba; nan a compara esaki cu otro paisnan, y e ‘periodiek verhoging’ cu e empleadonan publico ta haya, automaticamente, a base periodico. Esakinan tambe ta temanan cu nos ta trahando riba nan y wak con nos por baha y mitiga nan, pasobra nan no por sigui crece manera nan ta creciendo, debi cu simplemente bo no por pague”, Minister Presidente a subraya.
E mandatario a bisa cu CAft tambe a papia di FASE. “Caft a papia cu algun hende cu segun nan a haya FASE y nan ta traha y ta abusando di dje. El a papia di taxistanan cu ta haya FASE. Nos sa cu FASE mester cuminza yega na su etapa final. CAft a propone pa haci esey 1 di November, pero den esey nos ta diferencia di opinion”, e dignatario a subraya.
