Participantenan di e Clinica di “Fundación Real Madrid” patrocina pa Banco di Caribe cu caminata social cu boluntario y cachonan di Aruba Animal Shelter

ORANJESTAD (AAN):  Diahuebs ultimo participantenan di  “Fundación Real Madrid” a haci un caminata social rond di e area di hotel hunto cu e boluntarionan di Aruba Animal Shelter. 

Akinan a enfoca riba e importancia pa forma parti di algo social den comunidad. E participantenan a ricibi hopi informacion y a wordo en curasha pa respeta y stima animal.

            E obhetivo di e caminata social aki tabata pa haya turista y e participantenan pa adopta un cacho.  Banco di Caribe ta considera e clinica un oportunidad unico pa e hobennan local. Nos compromiso cu “Fundación Real Madrid” ta prueba di un contribucion continuo na desaroyo di nos muchanan y hobennan di Aruba.

            Na 2019, Banco di Caribe a haci e mes clinica aki pa muchanan di Corsou y Boneiro.  Awe nos ta contento di por ofrece hubentud di Aruba e programa valioso aki.

            Ta prueba cu deporte ta desaroya un mucha den un adulto cu lo ta di gran balor y contribucion na su comunidad; un di e motibonan pa cual Banco di Caribe ta sostene tipo di proyectonan manera esun di “Fundación Real Madrid”. 

Tocante e clinica di “Fundación Real Madrid”

            Na Aruba e aña aki por a conta cu participacion di 75 mucha. E muchanan di entre 6 y 13 aña di edad a participa den tres diferente categoria. E clinica na Aruba a wordo organisa pa e organisacion di futbol Team Dreyer, conhuntamente cu “Fundación Real Madrid” y a tuma lugar na Sasaki Sports Arena.             Participando na e clinica e hobennan  a ricibi nan uniform, tur articulo di e ekipo Spaño y algun dia di tecnica y tactica intensivo.

            Den transcurso di añanan Fundacion Real Madrid a organisa alrededor di 474 clinica di futbol den 45 pais. Mas di 47,853 hoben a beneficia di e programa.

            Riba fotonan adhunto un impresion di e muchanan cu ta formando parti di e clinica y e voluntarionan di Aruba  Animal Sheltor.