E salud di Pueblo ta e factor mas determinante den e proximo periodo di Gobernacion - Na 2020 a keda demostra con salud di un pueblo por deshaci di tur planificacion - Formador Wever-Croes ta tuma inventario di necesidad Cuido Medico 2021-2025
ORANJESTAD(AAN)- Loke Salud Publico por haci cu un pais y su gobernacion, a keda demostra na 2020 ora Aruba a pensa cu el a yega na un planificacion financiero pa Aruba den e presupuesto di 2020.
Tabata trata di e Prome Presupuesto di Gobierno Wever-Croes 1 cu lo a pone e entrada y gastonan di Aruba den balansa y lo a habri caminda pa un gobernacion financiero sano di e pais.
Un momento historico a wordo alcansa ora e Ministro di Asuntonan Financiero di Gobierno Wever-Croes 1, a entrega na Presidente di Parlamento e prome presupuesto cu mester a duna prueba di un gobernacion sano cu mester a sanea e situacion financiero di Aruba.
No a tarda pa Covid-19 asalta mundo, cu na 2019 a ricibi un advertencia di e Organisacion Mundial di Salud, cu mester practica mas atencion na e necesidadnan financiero di Cuido Medico debi na diferente factor.
Na 2019, ora e Organisacion Mundial di Salud a pidi tur pais na mundo pa duna Salud Publico y sigur e sector di Cuido Medico prioridad den nan calculacionnan di placa, ainda no tabata conoci cu na 2020 un malesa lo a deshaci di stabilidad mundial financiero y di tur calculacion financiero cu a wordo prepara rond mundo.
E actual formador di un gobierno nobo pa Aruba, Prome Ministro Wever-Croes sin duda lo no lubida, e momento cu mester a bandona e cifranan cu a wordo prepara pa Aruba a 2020 basa riba solamente e crisis financiero cu a wordo hereda na 2017.
Aruba mester a busca yudansa di Reino pa por a duna e cuido cu Covid-19 a haci necesario pero tambe pa introduci un respomsabilidad completamente nobo pa e comunidad, cu lo mester carga e paso di Covid-19 pa generacionnan cu ta bini.
Na diferente ocasion DIARIO a adverti su lectornan, cu gobernacion mester ta prepara pa gastonan cu ta parti di e realidad pa cual Salud Publico rond mundo no tabata prepara.
Mundo mester prepara pa un grupo grandi di pashentnan cu lo keda cu un enfermedad cronico, cu lo afecta nan bida largo, como resultado di Covid-19.
Na mes momento mundo mester adapta su Salud Publico na cambionan grandi cu e Era di Inteligencia Artificial lo introduci tambe pa Cuido Medico cu lo conoce exigencianan nobo debi na cambio den poblacion pero tambe di mas resultado di evolucion mundial, manera for di 2019 e Organisacion Mundial pa Salud a adverti.
DIARIO ta aplaudi cu awe mundo medico di Aruba a reuni cu e formador, cu asina a duna un lugar central na e Salud di Pueblo den formacion di un Gobierno, cu mester di un bon planificacion financiero di Salud Publico, cu ta depende di e calidad di awa cu pueblo ta bebe, e contaminacion di aire, cambio di clima y forma di bida y demas componentenan di un complexidad di factor.
DIARIO paso a paso lo informa di tur loke a bini dilanti durante e encuentro entre sector di Cuido Medico y Formador Wever-Croes cu ta encarga pa entrega Aruba un Gobierno nobo cu mester ehecuta un Gobernacion cu lo mester construi Aruba di nobo riba tur tereno cu miras no solamente riba Covid-19 pero sigur den e temporada di cambionan enorme na mundo pa cual for di 2019 DIARIO a prepara Aruba.
