* A urgi POH's cerca docternan di cas pa atende tambe cu salud mental - ORANJESTAD (AAN): E reunionnan entre Formador di Gobierno cu diferente stakeholder ta tumando lugar.
Diabierna tabata un dia unda stakeholdernan di sector di salud a reuni cu Evelyn Wever-Croes den su funcion di Formador.
Dr. Hendrickus van Gallen, director di Fundacion RESPALDO, tambe a haya e oportunidad aki y den conferencia di prensa el a laga sa con e reunion a bay.
Su prome impresion tabata cu e grupo di Formacion a scucha hopi bon kico e situacion di e sector di salud mental ta na Aruba y kico por wordo haci pa e sector aki.
El a agrega cu a splica den extenso con RESPALDO ta pensa y con nan tin cu bay bira na Aruba y banda di esey con tin cu traha hunto.
Banda di RESPALDO tin SPD y FMAA y nan tin cu bay traha hunto mas cu posibel pasobra ta den un temporada dificil aworaki y no ta bay bira facil den un par di luna tampoco, a remarca.
Durante e reunion a señala cu un parti hopi importante ta pa duna e docternan di cas ayudo pasobra eynan tur cos ta cuminsa ora cu e pashent ta acudi cerca nan. Aworaki e docternan di cas ta pasa e casonan pa RESPALDO pasobra e docternan no tin tempo y den dies minuut no por papia hopi.
Tin casonan cu por keda a docter di cas si e docternan di cas ta haya praktijkondersteuners (POH) mescos cu tin pa sucu y pa presion, por ehempel. RESPALDO a laga sa cu esaki ta un aspecto urgente y un di otro aspecto importante ta e trabao hunto di RESPALDO, SPD y FMAA, e psikiatra a duna di conoce. Esaki lo bira un parti importante pa den futuro centralisa tur cos.
A sinti hopi interes den scucha locual e fundacion kier a trece dilanti y pa esaki ta gradici cu gobierno kier cuminsa di e forma aki, pasobra esey ta e manera cu tin cu hacie. "Pa mi e tabata un exito", Van Gallen a expresa.
