Parlamento ta un motor pa hopi cambio necesario na beneficio di studiantenan

Parlamentario Shailiny Tromp-Lee na Hulanda:

ORANJKESTAD (AAN): Diaranson ultimo Commissie Koninkrijksaangelegeheden en Buitenlandse Betrekkingen (CKABB) di Aruba a reuni cu studiantenan na Hulanda. Di diferente regio na Hulanda a bin studiantenan cual sigur nos ta aprecia.

  Un encuentro cu a bay hopi bon caminda a trata reto, preocupacion, problema y ideanan di nos studiantenan.

  Topiconan cu sigur nos mester sigui duna atencion ta: (*) Preparacion di nos studiantenan (budgettering, aplicacion pa kamber na tempo, ov-kaart etc).  (*) Atencion na dominio di Hulandes y e ahustacion of cambionan necesario den nos enseñansa pa nan ta mihor prepara.  (*) Mehora e decaanfunctie na Aruba, pa empodera nos hobennan pa nan por haci un escohencia corecto di loke nan kier bay studia mirando cu den pratica hopi hoben ta hayanan ta cambia di estudio na Hulanda.

   Tambe a papia riba: (*) Atende cu nan demas retonan (rapport Arubahuis, rapport Ombudsman) pa percura pa nan por termina nan estudio exitosamente y mas cu tur cos pa nan regresa Aruba back y aporta na desaroyo di nos isla. Pa esaki nos mester sigui urgi gobierno pa bin cu incentivanan beneficioso.

  “Desde cu mi ta miembro di CKABB mi a bin ta percura pa enseñansa ta y ta keda riba agenda di Tripartiet y IPKO pasobra mi ta convenci y a demostra cu nos por ta e motor pa hopi cambio necesario na beneficio di nos studiantenan,” Parlamentario Tromp-Lee a splica.

   Un preocupacion particular cu a keda comparti cu nos ta cu nan ta realisa cu tin scarsedad grandi na tereno y cu prijsnan di cas ta birando impagabel pa nos hendenan. Aki sigur mi a comparti cu nan cu pa November awor mi ta presentando un inciativa di ley pa brinda e regulacion necesario pa garantisa cu nos hendenan tin e oportunidad pa yega na un cas cu nan por paga y forma nan hogar. Intencion ta pa regula cu bo por cumpra un cas na Aruba unicamente si bo ta bin biba realmente den dje.