Huespednan di Secrets ta satisfecho cu e proyecto y e bista riba naturaleza

General Manager di Secrets, Jose Maria Perez de Ureta:

ORANJESTAD (AAN) E General Manager di Secrets Baby Beach Aruba Resort, señor Jose Maria Perez de Ureta (hotel cu recientemente a habri den Seroe Colorado, San Nicolas), den entrevista cu Matutino DIARIO, a enfoca riba  e acogida ricibi di e huespednan.

   “Berdad ta cu tur e comentarionan cu nos ta hayando for di e huespednan ta sumamente satisfactorio. E proyecto aki a gusta masha hopi mes, tabata tin hopi expectativa, y berdad ta cu tur e bishitantenan Mericano cu ta bishitando e hotel, ta hopi satisfecho di con e hotel aki a keda, y di e servicio cu ta wordo brinda na nan. Ademas nan ta encanta cu e Isla, ya cu nan tur ta huur auto, y ta bishitando henter Aruba”,  Perez de Ureta a resalta.

   El a agrega cu mayoria di nan huespednan ta prome biaha cu nan ta bin Aruba, pero nan ta guest ripitido di e otro Secretnan cu tin den henter Caribe y Europa, locual a bira un berdadero exito di a duna e oportunidad cu e hotel aki ta na Aruba y cu nan por conoce e Isla completo.

“Pa e turistanan aki e enclave di Seroe Colorado ta naturaleza puro, pa nan ta magnifico e aire puro, e trankilidad cu ta wordo biba den e zona aki di e Isla, cu ta loke mas nan ta aprecia, y na unda nan por wak un landscape precioso, tur sorto di cactus, e playa, Royal Beach, y Baby Beach, y tur e paseo aki cu nan ta haci a lo largo di Seroe Colorado, nan ta haci excursionnan riba bicicleta, y ta yega te e propio ciudad di San Nicolas, unda nan ta bishita henter e parti centrico, e muralnan, etc. Berdad ta cu nan experiencia y e feed back cu nan ta dunando nos, ta sumamente bon”, Jose Maria Perez, Gerente General di Secrets a subraya.