PAN ta e refleho di e pan cu e artistanan no a haya durante Covid-19

ORANJESTAD (AAN):  Na Ateliers'89 a tuma lugar un tremendo exposicion cu yama PAN. Elvis Lopez di Ateliers'89 a indica cu durante e pandemia Mondriaan Fonds di Hulanda a dicidi di sostene e artistanan di Aruba cu ta traha cu Ateliers'89.

El a splica cu esaki ta un momento unico, unda un instancia di Hulanda ta subsidia e artistanan di Aruba pa via di Covid-19.

Ora cu a yega asina leu, a puntra e artistanan si nan tabata kier participa di un exposicion nobo ya cu desde Atelier na San Nicolas no tabata tin un expo manera esaki mas.

Tres aña largo a pasa prome cu por a haci un expo manera esaki.

Durante e pandemia Ateliers'89 mester a reinventa su mes cu un website nobo. Esaki ta algo special pasobra ta bay carga e artistanan di Aruba.

Asina a yega na e expo aki unda a yuda 17 artista y diadomingo anochi por a mira e resultado cu e tantisimo hende cu a acudi pa aprecia e expo aki, a bisa.

PAN ta un expo unda e artistanan por a expresa nan mes y loke nan a pasa durante e pandemia, Elvis Lopez a finalisa bisando.

PAN ta e refleho di e pan cu e artistanan no a haya durante Covid-19. E expo a consisti di instalacionnan, performance, video, fotografia, pintura, muralnan, escultura y diseño digital.

E artistanan cu a participa ta: 

Velvet Zoe Ramos, Anuar Habibe, Jess Wolff, Armando Goedgedrag, Desiree Sporkslede, Brunal Anaya, Suyin Ridderstaat, Samuel Sarmiento, Chelsea Peterson, Danilo Geerman, Natusha Croes, Romelinda Maldonado, Fernando Vermeer, Sharelly Emanuelson, Ken Wolff, Irvin Aguilar y Wilfred Jansen.