ORANJESTAD (AAN): E siman aki, Partido AVP a splica cu informacion a yega cerca trahadonan di hospital y tambe probablemente cerca esunnan di ImSan, cu e Landspakket ta den pleno ehecucion.
Como parti di e Landspakket aki, recortenan, austeridad y medidanan ta forma parti esencial di e forma di mira e futuro di Aruba manera articula y poni tambe den e Landspakker cu a keda firma pa y despues un biaha mas ractifica recientemente pa Evelyn Wever-Croes.
AVP a splica cu den debatenan cu a tuma luga prome cu eleccion, nan tabata e unico partido cu a mustra cu e Landspakket tin enfasis demasiado grandi riba recorte, riba austeridad, riba medida y mas impuesto y mucho poco atencion riba recuperacion economico di Aruba.
Si e recuperacion economico aki no tuma luga, entradanan di gobierno ta keda minimal caminda gobierno lo keda den e ciclo vicioso aki di busca caba bes un forma pa corta den enseñansa, corta den salubridad publico, corta den asistencia social, corta den salario di personal y tambe busca mas entrada cu impuestonan.
Segun AVP, un rapport supuestamente ta mustra cu tin cantidad di medida proponi den ciudo medido, cu ta afecta directamente y severamente e pashentnan, afecta comunidad tambe, y ta mustra cu gran preocupacion cu gerencia di Hospital a worde notifica den cuadro di e Landspakket, cu mester bin cu austeridad mas ainda, cu mester bin cu reduccion substancial di salario di empleadonan.
AVP a bisa cu aki ta trata di un cortamento di 10 porciento den salario.
E partido berde a bisa cu nan ta sumamente preocupa pero tambe desapunta cu e direccion aki ya cu den hopi pais rond mundo, mas tanto Europa, esunnan cu a traha den cuido medico, a haya y un aumento y reconocimento pa e sacrificio cu nan a haci, sea den salario of otro formanan di compensacion pa tur a trabao cu nan ta haci.
Sinembargo na Aruba e prioridad a bira pa corta den salario di esunnan cu ta traha den cuido medico y na diferente ocasion nos a mustra cu na momento c’un pais tin retonan grandi su dilanti, e trabao primordial di gobierno mester ta pa trece tur stakeholdernan, tur partner na mesa, delinea kico ta e reto, papia di e solucionnan, papia di e alternativanan cu por encamina pa e pais por sali mihor for di retonan.
