Christopher Arends ta representando Aruba den Panamericano Rok Cup Challenge 2021

ORANJESTAD (AAN): Actualmente Christopher Arends, piloto professional di karting (33) ta cu su team na Kartodomo Laguna Viva, Villavicencio, Colombia representando Aruba den Panamericano Rok Cup Challenge 2021.

Christopher Arends a gana ultimo careda di Rok Cup Challenge na Januari, 2020.

Arends ta bin di famia di racing y nada straño pa su famia, el a cuminsa core su prome auto di careda na un edad di 3 aña. El a competi den diferente careda, na unda el a haya oportunidad den tur aña di su carera di karting pa representa Aruba internacionalmente y varios biaha a trece copa pa Aruba.

E careda aña aki ta uno hopi special, ya cu e ganador di Panamerican Rok Cup Challenge lo califica pa competi den Campeonato di Europa di Karting den October 2021 na Italia. Su meta ta pa presenta Aruba den Campeonato di karting mas grandi di aña 2021.