Oriana Wouters ta representa Aruba na e Conferencia COP28 na Dubai

ORANJESTAD (AAN):  E siman aki, 30 di november pa 12 di december, ta tuma luga na Dubai e di 28 conferencia anual riba cambio climatico di Nacionnan Uni, COP28,

E conferencia aki ta tuma luga anualmente pa evalua progreso den maneho di clima, negocia y tuma desicionnan tocante e implementacionnan.

            Di parti di Gobierno di Aruba, ningun minister lo biaha pa Dubai pa e conferencia aki pero hunto cu Gobierno di Reino, a dicidi cu Minister di Energia di Hulanda, Rob Jetten, lo representa Reino.

            Pa Aruba sinembargo, señora Oriana Wouters, kende ta un hoben pasiona pa medio ambiente y agricultura a wordo selecta pa e organisacion internacional Island Innovation, pa representa e bos di hobennan na e conferencia di COP28. Island Innovation a selecta 10 hoben den region, mayoria mucha muhe, pa un experiencia y aprendisahe completamente financia. Oriana Wouters den esaki lo sali pa e interesnan di Aruba.

            Dialuna 20 di November, Prome Minister Evelyn Wever-Croes y Minister di Energia Glenbert Croes a reuni cu Oriana tocante su participacion na COP28 y alabes a duna Oriana informacion tocante e maneho di Gobierno pa cu energia. Presente tambe den e reunion tawata señora Joselyn Croes di DBB. Minister Glenbert Croes a entrega Oriana e Nacional Energy Policy cu durante Gabinete Wever-Croes I a wordo traha y ehecuta awo den Gabinete Wever-Croes II. Durante e reunion a intercambia cu Oriana riba diferente iniciativa di Gobierno di Aruba riba adaptacion na cambio climatico.

            Den nomber di Gobierno di Aruba, Prome Minister ta felicita señora Oriana Wouters y ta dese’e hopi exito na e conferencia COP28 y pa representa e bos di Aruba den un conferencia asina importante.