ORANJESTAD (AAN): Diadomingo mainta trempan pa 6:15 am, momento cu Polisnan tabata patruyando den area di Olde Molden,
diripiente nan a mira un auto subcompacto Mazda Demio color blauw coriendo bayendo pariba dilanti e establecimento.
Ora cu a yega na e T-weg na e cruzada cu Avenida Nelson Oduber, e auto a djis sigui core y dal den e acera cu tin mey-mey. Esaki a ocasiona cu e auto chikito a perde dos wiel, como cu dos taira a bay flat.
A base di esey, Polisnan a duna e chauffeur un señal pa e stop, y el a haci esey tambe. Den prome contacto cu e chauffeur, nan a mira cu e persona aki ta fuertemente bao influencia di un of otro substancia. Esaki ta debi cu su wowonan ta basta cora, y ta papiando cu un lenga pisa.
Ora cu Polis a pone sali y papia cu nan pafo, agentenan a mira cu e middle-console di e auto tin dos sakito transparente di plastico cu tin substancia blanco aden parecido na piedra di cocaina, y 1 sakito transparente di plastico conteniendo marihuana.
E chauffeur a admiti na Polis cu e tin “piedra” den su poder. Polis a mira cu tin un saco di plastico riba e asiento di pasahero. E saco aki tabata contene un suma grandi di placa cash y moneda.
Aki diripiente e chauffeur a cuminsa bira agresivo contra agentenan y diripiente no tin oido mas pa nan. A base di esaki, Polisnan a informa e chauffeur cu e ta deteni pasobra a viola Ley di Droga. Ora cu a wanta su man drechi pa pone tras di su lomba pa pone boei, el a cuminsa rek masha duro mes na esaki den direccion contrario.
Pa kibra su resistencia, Polis a dicidi na un forma tactico pero cu esfuerzo fuerte pa mande na suela. Unabes abao, Polisnan a logra na un forma safe di trece e homber bao control y pone boeinan na su man.
E homber di inicial M. a wordo avisa cu el a wordo gara cu man den mansa di a viola Articulonan 3 y 4 di Ley di Droga, y Articulo 2:133 di Codigo Penal di Aruba. Nan a manda busca vehiculo special di transporte cu a hibe Warda di Polis.
