Oportunidad grandi pa fortifica agricultura comercial entre Aruba y Surinam

Minister Geoffrey Wever:

ORANJESTAD (AAN): Diahuebs mainta Minister Geoffrey Wever y delegacion di Aruba a sinta cu Minister di Agricultura, Cria di Bestia y Pisca di Surinam Sr. Parmanand Swedien.

   Minister Wever riba esaki a declara: “Mi a splica con hunto cu Minister Arends di sector primario nos ta stimulando agricultura comercial na Aruba, entre otro door di a incorpora e Agrifund, door di organiza Agri Business Academy, door di ta trahando riba e Agri Innovation Park y door di ta haciendo estudionan riba e tereno di agricultura comercial investigando cua berdura ta mihor pa nos cultiva y cu ki tecnologia lo haci esaki”.

   Topiconan di e combersacion tabata intercambio di personal di Santa Rosa y DEZHI di Aruba cu e departamento di agricultura y economia di Surinam pa un periodo pa asina tin intercambio directo di conocimento. Tambe a papia di e posibilidad pa studiantenan di EPI y Universidad di Aruba por haci un stage na Surinam pa wak con e agricultornan na Surinam ta opera. Un opcion interesante cu Surinam ta brinda ta tereno pa agricultornan di Aruba cultiva na Surinam pa exporta pa Aruba.

  “Un oportunidad interesante ta pa match inversionistanan di Aruba cu ta busca oportunidad di inversion y agricultornan na Surinam cu tin conocimento di agriculta pero kizas no tin aceso na financiamento. Nos a palabra cu nos ta bay stimula e matchmaking aki”, según Minister Wever.

   “E intercambio tabata sumamente interesante y nos a palabra cu e simannan nos dilanti nos lo bay traha riba un framework pa formalisa e intencionnan. Mi ta hopi entusiasma pa cu e oportunidadnan aki cu Surinam por ofrece Aruba”, segun Minister Geoffrey Wever.