Parlamentario Aquanette Gunn (MAS): Tocante rapport STEPS
ORANJESTAD (AAN) – Parlamentario Aquanette Gunn, di fraccion di Partido MAS, a comenta tocante e resultadonan preocupante di Rapport STEPS 2023, a señala cu tin diferente factor cu ta stroba pueblo di come saludabel, entre otro e costo di alimentacion, vooral fruta y berdura. Esaki, entre otro.
E Parlamentario a señala cu banda di hala atencion di autoridadnan concerni, mester di trece concientizacion. El a subraya cu berdaderamente mester di data, mester wak mas leu cu data, di con nos comunidad ta come na un forma no saludabel. Gunn a señala cu si nos poblacion no ta come saludabel no tabata tin mester di haci un investigacion pa yega na e resultadonan preocupante cu tin, pasobra e ta bisto tur dia.
“Pero nos tin cu wak e incentivo cu nos por bin cu ne, pa asina e persona cuminza bay den e direccion di come saludabel. Pasobra bo no mester lubida cu pa bo hiba un bida saludabel, come saludabel, e ta costa placa”, Aquanette a subraya.
El a haci un comparacion di locual un famia di poco recurso mester scoge pa su famia, por ehemplo entre fruta y galiña, entre aroz y berdura teniendo cuenta cu su entrada. Berdura y fruta hopi caro na Aruba.
El a enfatiza cu tin hopi factor pakico e resultado di STEPS a duna e porcentahe asina preocupante.
“Mi ta kere si cu nos mester wak’e na un forma no individual, nos mester mira for di un perspectiva multifuncional pasobra e no ta solamente e resultado sino mas ainda, ki tipo di persona bo ta”, e Parlamentario a bisa.
Hopi biaha obesidad por ta un tipo di adiccion, el a menciona, y mester wak pakico ta e origen, pakico un persona ta abusa di cuminda. “Dus, e ta un factor hopi mas compleho di locual cu ta ser pinta. Pero si mester mas atencion, y mester por limita e situacion tambe, caminda cu docternan di cas por atende e pashent, minimo 15 minuut pasobra aworaki bo ta simplemente un number, y hopi biaha e docter no ta comunica y saca afo pakico kizas, e persona aki ta obeso. Kizas e tin problema psicologico, pues e tin hopi factor”, Aquanette Gunn a comenta.
El a reitera cu e situacion mester di mas atencion y parlamento mester sinta cu AZV pa wak kico nan por haci pasobra berdaderamente, a bin un departamento pa hiba bida saludable, Minister a bin cu ne, pero su factibilidad ta keda cu na final di dia, nan por duna conseho, duna e persona un lista di cumindanan saludable, pa e por cumpli cu ne p’asina cambia su habitonan alimenticio, pero na final di dia ta keda si e persona tin e fondonan financiero pa haci esaki.
