"Nos por siña hopi di intercambionan cultural entre Aruba y Colombia"

Minister Xiomara Maduro:

ORANJESTAD (AAN): Minister di Cultura Xiomara Maduro recientemente tabata invitado di un encuentro cultura na Consulado di Colombia, unda cu tabata tin artesanonan di Colombia y Aruba presente.

Ora cu e mandatario a yega el a topa y haya un presentacion y splicacion di e bunita obranan di arte traha pa e grupo Colombiano, splicando Maduro tambe di e procesonan envolvi den e arte y e inspiracion necesario.

E minister a hiba palabra tambe y a splica cu algun tempo atras el a bishita La Guajira.

“Mi mester bisa cu tabata un experiencia hopi bunita y mi tabata tin e placer tambe di bishita un ‘rancheria’ pa asina por conoce e cultura”.

Esnan cu conoce mi sa cu mi gusta participa na Cultura, pasobra Cultura bo tin cu bib’e.

Esaki segun e mandatario kende a sigui bisa cu eynan na Colombia e tabata tin e oportunidad tambe pa participa na un baile.

El a splica cu el a wordo regala un manta Colombiano tradicional y nan a insisti pa e bisti esaki durante e baile.

Segun Maduro, e kier haya sa mas di e cultura bunita Colombiano y pesey e ta haya cu e tipo di intercambionan aki ta hopi importante.

E minister a trece dilanti cu nos na Aruba tin un relacion estrecho cu Colombia, mirando tambe cu 10% di nos poblacion  a nace na Colombia.

Banda di esaki tin asina tanto habitante na Aruba di un of dos mayor Colombiano.

“Na Colombia un investigacion a mustra mas ainda con grandi e conexion ta entre Aruba y Colombia, mirando tambe algun di e famnan cu ta aparece na Colombia y Aruba”.

Ainda falta hopi pa siña, pero e tipo di intercambionan cultural aki ta e manera perfecto pa haya sa mas y realiza cu tin hopi similaridad entre e dos culturanan, segun Maduro.