Zinnia Ras un biaha mas a sali candidata mas popular

Den evento di Miss Youth Aruba

ORANJESTAD (AAN): Diasabra anochi a cera parti di Promenade na San Nicolas, pa asina riba e pida caminda aki di Zeppenfeldtstraat a tene e anochi di “Beachwear Glam Fantasy”, di e organizacion di Miss Youth Aruba.

   Siete candidata a presenta riba caya, cu apoyo total di publico pa asina mustra nan fantasia cu ta completamente dedica na San Nicolas, den nan costuum y discurso rond di esaki.

   E anochi aki a escoge tambe e candidata Popular pa Beachwear Glam Fantasy, y esaki a bira Zinnia Ras di 15 aña di Pos Chiquito.  Esaki ta di dos biaha cu e ta obtene e titulo di Popular den eventonan di e certamen aki.

   E anochi aki, Zinnia cu su trahe di fantasia a rindi homenahe na e pelotero di Grandes Ligas, Xander Bogaerts.  El a mustra cu Bogaerts ta di San Nicolas, y a crece den deporte di baseball.  Su trahe di fantasia tin e ciudad di ‘San Diego’ borda riba dje, y na su braza a bin cu un banner bunita dedica na e añanan cu Xander tabata forma parti di Boston Red Sox.  Riba su cabez, a crea un fantasia di e Copa di Campeon di Serie Mundial di Baseball.

   El a ricibi su premio for di man di Mary-Jane Kransen kende ta Miss Teen Mundial Aruba 2024, y un regalito for di man di Miss Youth Aruba 2024 Little Sister, esta Zahirah Mohamed, y e sjerp for di Amelia Elskamp, kende ta actual Miss Youth Aruba 2023.