Bunita encuentro cultural di artesanonan na Consulado di Colombia

ORANJESTAD (AAN):  Recientemente a tuma lugar un encuentro cultural na Consulado di Colombia, unda cu diferente artesano Colombiano y local tabata presente.

Prensa a entrevista Soraida Wever presidente di Fundacion Pulso y el a splica cu esaki ta parti di un proyecto cu Pulso a cuminza cune algun luna pasa.

“Nos a cera cabez cu artesanonan di e region di Cauca na Colombia, pa nos por intercambia conocimento y asina eleva e arte y artesania na Cauca, pero tambe aki na Aruba”, segun Wever.

El a sigui bisa cu luna pasa un grupo di artesano di Aruba a bay Colombia y eynan nan a participa na diferente tayer, incluyendo por ehempel uno di ceramica (klei).

Nan a siña tambe traha nan mesun popchi, nan a traha cu material di felpa, mientras cu nan a siña traha un tas chikito tradicional di Colombia tambe.

“Nan a participa na diferente tayer den un programa mas amplio posibel, pa asina nan por haya hopi mas conocimento cu akinan nos no tin ainda”.

E intencion ta tambe pa nan wordo stimula pa sigui desaroya nan mesun disciplina, segun Wever.

Minister di Cultura Xiomara Maduro tambe tabata presente y a papia cu diferente di e artesanonan Colombiano, pa haya un bon splicacion di e intercambio y di e mundo di artesania.