Ningun plan mas pa haci algo cu ex- Don Bosco School na San Nicolas

ORANJESTAD (AAN): Riba e potret aki por mira Ex-Don Bosco School cu tambe ultimo dianan tabata hopi den boca di pueblo.

   Recientemente e stakeholders cu a bay papia cu Formador y tambe futuro partner di coalicion, a papia riba tur topico cu tin di haber cu enseñanza y con pa mehora esaki.  A papia cu tur hende cu tin algo di haber cu educacion.

   Sinembargo en realidad, ningun a menciona algo di ex-Don Bosco School, ni si acaso tin plan pa use, ni si tin deseo pa e wordo remodela, y nada.  E ta djis benta di berdad den un lachi hopi hundo mes “di olvido”.

    Y manera por mira riba e potret aki, Don Bosco School a bay hopi atras, pues e ta cera actualmente, tur sorto di mata y yerba ta crece pa su cuenta, y el a hasta bira un “Cas di Adictonan Ambulante” cu ta haci y deshaci eyden.

   Ta parce cu ultimo biaha cu algo a wordo bisa encuanto ex-Don Bosco School den pasiyo di oficinanan di Gobierno, tabata cu nan kier a converti e edificio aki den un Scol di Educacion pa Ofishi pa yuda esnan cu tin di rehabilita y bay traha den Refineria, of den e Hotelnan nobo cu tabata planea pa Sero Colorado.

   Tur cos a keda status quo, y te awe nada a wordo haci cu esey.

   Y kendenan ta drenta sali di dje?  Ta hendenan cu kizas a traha duro den nan bida, pero awor ta pa nan cuenta sin pariba y pabao debi cu situacion di bida a dal nan duro.