Asistencia di Gobierno a scapa Comercio di colapso den pandemia - *Importacion ilegal di articulonan ta enemigo di produccion di trabou - *Companianan grandi den exterior ta beneficia di abuso contra comercio local
ORANJESTAD(AAN)—Uno di e problemanan cu mester a atende durante Covid-19, tabata e resultado di e malesa pa Comercio di Aruba cu a perde su entrada. Cu un cantidad di empresa no a cera nan porta, tabata pa motibo cu Gobierno a tuma medida y a duna sosten financiero na empresanan local pa asina nan mantene nan trahadornan den servicio y cumpli cu nan debernan basico.
E decision sumamente importante aki di Gobierno a evita cu cantidad di trahador a keda sin trabou y cu un bom social lo a rementa na Aruba, manera a socede hasta na paisnan grandi caminda gruponan grandi di trahador a perde nan trabou.
Aruba ta bolbe topa cu un situacion serio cu e ola nobo di e coronavirus nobo, cu awe a haya e variante peligroso Delta. Kico e resultado lo ta pa empresanan na Aruba?
Den e situacion aki, dos situacion importante ta bini dilanti. Trabou ilegal cu ta afecta trahadornan pero cu ta wordo controla dor di autoridad.
E otro banda di medaya den e produccion economico di Aruba, ta keda un problema grandi.
A pesar di e peligernan internacional y e pandemia, na momento cu trafico aereo a bira posibel cu sigur Merca pero tambe mas y mas Hulanda entre otro, dos enemigo grandi di economia di Aruba, di comercio legal, ta presenta nan mes.
Nan ta directamente mara na otro e asina yama “Shadow Economy” (economia di sombra) y black market (mercado negro).
Mercado negro ta un forma absoluto di importacion ilegal. Den e situacion aki e personanan cu ta haci nan mes culpabel, ta haci bofon di tur areglo pa importacion pa introduci articulonan contra ley na Aruba.
Den e caso aki nan no ta paga ningun tarifa pa importacion of tarifanan mas abou, ta reduci nan gastonan na un minimo loke ta haci cu nan ta bira enemigo directo di comercio local, cu ta genera trabou y asina pan pa trahadornan di Aruba.
Pa medio di e Economia di Sombra cantidad di hende tin entrada na Aruba. Mester bisa cu e Economia di Sombra, ta haci cu hende por tin un extra ganashi cu nan productonan.
Bende pastechi a haci cu hopi mama den historia di Aruba a percura pa nan yiu bay school.
Bende pastechi, sinembargo, den e Economia di Sombra, por stroba e mama di awe cumpra necesidad pa mucha bay school.
Den e Economia di Sombra, por mira con sistemanan comercial nobo ta haci bofon di e posibilidad pa tur hende por gana placa como empresa mas chikito of mediano na Aruba.
Gruponan di comerciante desconoci, hasta ilegal, ta forma nan mes pa haci negoshi ilegal den e Economia di Sombra cu Servicio di Belasting y tur instancia oficial tin problema pa controla.
Productonan cu ta drenta via di mercado negro, no ta paga impuesto. Pero e forma cu nan ta wordo bendi, no conoce e gastonan cu un comerciante oficial y inscribi na Camara di Comercio conoce.
Productonan importa via mercado negro, ta wordo bendi pa medio di rebendedor, cu atrobe no ta paga belasting cu trahadonan mester paga.
Ora busca origen di e productonan cu ta drenta pa medio di Mercado Negro, por topa aki cu productonan cu no por wordo bendi na Merca pa nan prijs original of sigur no por wordo ofrece na clientenan debi na nan fayonan di produccion.
Productonan cu ta wordo rechasa dor di fabrica pasobra nan no ta bon traha y tin problema di calidad, ta wordo cumpra dor di personanan cu ta biaha pa exterior pa cumpra articulo cu nan ta bende scondi na Aruba, caminda e comerciante oficial si mester responsabilisa su mes, si e producto cu el a importa, no ta bon/
Comercio ta aporta na companianan di Gobierno cu luz, awa, telefon, etc. Comercio ta aporta na otro comerciantenan y ta duna trabou na ciudadanonan.
Comercio ta paga huur. Comercio ta paga belasting y Comercio ta visibel pa tur autoridad, loke no ta e caso cu Mercado Negro ni personanan cu ta move den e Economia di Sombra cu ta mucho mas poderoso cu lo pensa.
Control di un fenomeno cu ta un peliger pa e pais cu kier recupera, ta posibel.
Ademas mester tene na consideracion e migracion, cu ta yuda e importacion di productonan pa medio di lazonan familiar den exterior.
Manera DIARIO a adverti, e pandemia ta bolbe afecta Aruba, cu ta habri porta pa un cooperacion nobo cu Hulanda y recuperacion.
Den esaki mester tene cuenta cu puntonan cu sigur ta afecta comunidad.
