Galapagos lo bay conta pa prome biaha cuanto yuwana roos tin na volcan Wolf

QUITO: Un expedicion di cientifico y park rangers lo bay conta pa prome biaha e poblacion di yiwana roos, un especie endemico di volcan Wolf, na e islanan di Galapagos den Oceano Pacifico cerca di ecuator.

   Segun Parque Nacional Galápagos (PNG), durante 10 dia largo un grupo di 30 persona “lo keda check henter e area di bida di e yuwanan roos na volcan Wolf, na e parti panort di isla Isabela (esun mas grandi di e archipelago) pa haci un conteo integral di e poblacion di e reptilnan aki,” segun PNG a bisa riba nan account di Facebook.

   E expedicion lo regresa awe Diahuebs 12 di Augustus cu e informacion riba yuwananan roos, cu a wordo descubri door di ciencia na 2009 y cu ta habita exclusivamente un area di 25 kilometer cuadra na volcan Wolf na Galapagos, cu a wordo declara Patrimonio Natural di Humanidad y reserva di biosfera pa su flora y fauna unico na mundo.

   Algun monitor cu a yega di wordo haci di e reptilnan aki, ta sugeri cu lo por tin como 350 di nan.  Sinembargo te cu awor no a topa cu ningun yuwana jong.

   E plan di expedicion ta pa “trata di compronde e estado real di e poblacion” di yuwana aki pa diseña un plan di accion pa e maneho di e especie aki.  Cientificonan lo busca tambe ‘tortuganan hibrido di interes pa wordo conserva’.

   Aña pasa un otro team di investigador a descubri den volcan Wolf un hembra cu carga genetico grandi di e especie Chelonoidis abingdonii, un variedad di tortuga grandi cu a wordo extinto na isla Pinta y cu ta pertenece na e famoso Solitary George, cu a muri na 2012 despues cu el a nenga di wordo cera cu hembranan.

   PNG ta calcula cu na e volcan aki tin entre 10.000 y 12.000 tortuga riba un superficie di 600 kilometer cuadra.

   Galapagos cu ta como 1.000 kilometer di e costa di Ecuador, a inspira e teoria di evolucion di especie di Charles Darwin.