Na aña 2004 Aruba a ser a conoci di hopi cerca cu e horcan Ivan

            Dia 2 di September 2004 a desaroya un Depresion Tropical y un dia despues e tormenta a bira tormenta tropical Ivan.

E sistema tropical a sigui desaroya te na un horcan categoria 4.

            Dia 7 di September Ivan a pasa pega cu Grenada bayendo West Noord West direccion Aruba, Bonaire y Curacao. September 9 Ivan a bira un horcan grandi y peligroso di categoria 5 y National Hurricane Center a duna Aruba un Hurricane Warning.

            Gobierno a declara estado di alerta y schoolnan a cera. Tur autoridad tabata ariba maximo alerta. Ya pa atardi di dia 9 di September Aruba a cuminsa sinti e prome efectonan di Ivan. Lama a bira bruto y olanan grandi a azota costanan di Aruba.

            E madruga y mainta di dia September 10 awacero torencial a azota Aruba. Districtonan di Noord y Oranjestad ta esunnan mas afecta pa awacero. Awa a yena Sasakiweg completamente y trahadornan di hotel y hospital no por a yega trabao cu auto normal y mester a uza truck y jeepnan halto pa hiba nursenan na hospital.

            E bario di Madiki a keda completamente bao di awa. Diferente cas a inunda cu awa y Marina Real Hulandes cu autoridadnan local tabata haci operacionnan di rescate.

            E habitantenan a perde tur nan pertenencianan. Horcan Ivan a pasa alrededor di 80 miya noord di Aruba pero a laga 2.5 inch di awacero den menos di 4 ora.

            Aruba a keda na e parti di e horcan na unda cu tabata tin menos awacero y biento. Aruba a haya bientonan di solamente di entre 40-50 miya pa ora. Na e parti pariba di Baby Beach, olanan grandi y bruto a traha un rif halto di piedranan di lama cu te ainda ta existi.

            Por bisa cu Aruba a scapa di un horcan peligroso di categoria 5 cu a laga desastre den Caribe.

Compila pa Roberto Croes

Nos Historia Nos Herencia