KRALENDIJK: Gobierno di e isla, hunto cu Bonaire International Airport, y Tourism Corporation Bonaire (TCB) ta introduci un medida nobo cu ta drenta na vigor entrante Diabierna 1 di Juli 2022, y nan a yame ‘Visitor Entry Tax’.
For di e dia ey adelante, tur hende cu yega Bonaire sea cu avion, boto, of barco, tin di paga e Visitor Entry Tax aki. E pago mester ser haci pa cada bishita.
Gobierno di e isla a enfatiza cu e Tax aki no ta conta pa habitantenan di Bonaire cu ta biba oficialmente riba e isla.
Pa evita malcomprondemento, nan a traha un grafico unda bo ta mira ken si, y kico ta e suma cu bo tin di bay paga. Entrante fin di Juni aki mes, e bishitantenan por cuminza paga e Visitor Entry Tax online via e website. Of ora bo yega Bonaire, bo por paga esaki na Aeropuerto usando carchi, como cu nan lo no acepta placa cash.
Bishitantenan cu ta drenta Bonaire cu boto, tambe lo tin di paga e Visitor Entry Tax.
Un turista Mericano of turista Europeo, cu tin 13 aña bay ariba tin di paga $75 pa drenta e isla. Esnan di 12 aña bay abao ta paga solamente $10.
Esnan di Aruba, Curaçao, St. Maarten, St. Eustatius y Saba cu yega Bonaire, tin di paga solamente $10 pa e Visitor Entry Tax aki.
Segun gobierno di Bonaire, e “Visitor Entry Tax” ta bay reemplaza loke anteriormente tabata conoci como ‘Roomtax’ na e isla (cu tabata $5,50 pa persona/anochi), y e ‘Rental Cartax’ ($4 pa auto/dia).
DIARIO a compronde cu ora e turista ta bandona Bonaire, na Aeropuerto e tin di paga un Airport Tax di $35 tambe. Esnan cu ta viaha pa Aruba, Curaçao, St. Maarten, Saba, y St. Eustatius ta paga Airport Tax di $9. Normalmente e Airport Tax ta poni den e prijs di pasashi.
