Muher na Spaña a kibra record kedando 500 dia den cueba

E tin 50 aña di edad...

GRANADA: Tabata Diasabra 20 di November 2021, pues tres luna prome cu Rusia a invadi Ucrania, cu un dama atleta a drenta den un cueba cerca di Granada na parti zuid di Spaña, determina pa kibra record mundial y haya sa mas con e mente y curpa humano por adapta na isolacion extremo y deprivacion.

   Beatriz Flamini di 50 aña di edad a bay den un cueba scur na 70 meter bao superficie di tera pa keda 500 dia eybao.  Den su aventura di 500 dia, el a lesa 60 buki, skirbi, breien (cose), y tambe pinta cuadranan di obranan di arte.

   Diabierna 14 di April den oranan di mainta el a sali bek for di e cueba ora cu el a logra yega 500 dia.  El a sali afo cu hendenan gritando di alegria.  Despues di un chekeo rapido cu un docter y un sicologo, el a duna un conferencia di prensa.  El a bisa periodistanan cu el a kere cu ora e sali, e lo haya chens di dal un baño prome.

   Ora e tabata den cueba, el a wordo vigila pa un team di cientifico di Universidadnan di Almeria, Granada, y Murcia, kendenan a keda den contacto via un tecnologia special di manda mensahe limita.  Asina nan tabata vigila su bienestar mental y fisico.

   Tabatin un equipo di persona cu tabata saca su “sushi” tur dia, of cada pasa un dia.  Nan tabata trece abao tambe treat special pe manera awacati, webo fresco, y T-shirt limpi.

   Beatriz a bisa prensa cu el a perde nocion di tempo despues di dia 65.  Ora a puntre con el a logra mantene su mes sano asina largo, el a splica cu esaki ta danki na su experiencia extensivo y preparacion mental.

   El a capta tur loke e tabata haci den e cueba usando dos camera, y esakinan lo wordo usa pa un documentario cu lo wordo produci di esaki.  El a bisa cu el a haye tambe diripiente cu monton di musca den e cueba.  El a admiti cu ora e tabata den cueba, e tabatin hopi anhelo pa come roast chicken cu batata.