ORANJESTAD (AAN): Durante votacion pa saca un ganador pa Copa Hubenil Gobernador Felipe B. Tromp pa e aña aki tabata tin un empate y lot a dicidi cu e copa rotativo ta bay pa Rough Riders.
Pero comision a dicidi cu ta reconoce tambe e logronan di e hoben atleta Rebecca Jansen.
Rebecca lo ricibi tambe un copa cu ta carga nomber di Gobernador Felipe B. Tromp pa tur su logronan durante e ultimo aña pa e deporte di triathlon, esta coremento na pia, landamento y ciclismo.
Rebecca actualmente tin 17 aña y desde chikito ta activo den deporte, specialmente coremento. Na aña 2019 y 2021 e ta logra e premio Excelencia den Deporte den e categoria femenino di 14 pa 17 aña.
Na februari 2022, Rebecca ta sufri un accidente cu su bais durante entrenamento pa participa na e weganan Suramericano de de Juventud. E ta sufri un caida fuerte cu su
bais y ta kibra su elleboog. El a pasa den operacion basta grandi y ainda e ta hayando terapia pa su elleboog.
Pero Rebecca no a entrega: na luna di april di 2022 e ta cuminsa core atrobe y na october e ta participa den caredanan di Triathlon y Ciclismo.
Den triathlon e ta logra diferente premio sea prome luga of ganador overall tanto local como internacional, manera prome luga durante CARIFTA Triathlon na Bermuda, y cuatro luga pa Aquathlon.
Pa menciona algun logro; na april 2022 e ta keda na di tres luga di Boulevard Race den e categoria di 14 pa 19 aña, coriendo un distancia di dies kilometer den 49:15.
Na juni 2022 e ta gana Guardian Group Walk/Run di dies kilometer cu un tempo di 47:14. Na september 2022 e ta bira e ganado overall femenino U20 di Aruba Bank Walk and Run 2022 organisa pa Aruba Bank durante cuatro dia.
Otro logro di Rebecca ta na maart 2023 ora cu e ta gana e prome luga den e categoria di U25 di e Aruba International Half Marathon y segundo luga overall di e mesun careda prestigioso aki.
Riba tereno di ciclismo Rebecca ta cosechando hopi exito desde october 2022 te cu maart 2023, ganando diferente premio sea prome of segundo lugar. Por menciona overall ganado di un careda Tri-Bike di tres dia na februari ultimo.
Apesar cu su elleboog no ta completamente recupera, Rebecca ta participa na diferente competencia di landamento y ta destaca enormemente.
Pa su logronan y esfuersonan, e hoben Rebecca Jansen lo ricibi un premio di Copa Hubenil Gobernador Felipe B. Tromp dia 27di april, Dia di Rey.
