Ministro Geoffrey Wever a felicita Grupo Bennu pa reapertura di Mango na Caya Betico Croes

ORANJESTAD (AAN): Minister di Asuntonan Economico, Comunicacion y Desaroyo Sostenibel, Geoffrey Wever, a presencia e reapertura grandioso di Mango na Caya Betico Croes.

E Minister ta extende su felicitacionnan mas cordial na Grupo Bennu y ta gradici nan sinceramente pa nan confianza y contribuicion significante na economia di Aruba y nan inversion den e area principal di Oranjestad.

  Grupo Bennu ta doño di varios otro franchise cual nan shopnan ta ubica den caya grandi, y ta mustra di tin un conocemento pa e mercado local y regional. A pesar di e retonan tog nan ta mira e oportunidad pa sigui inverti. E reapertura di Mango ta un demostracion di confianza cu ta spera motiva otro empresarionan pa reconsidera e posibilidadnan den y rond di centro di Oranjestad, cual ta den liña cu esfuersonan di gobierno pa revitalisa e area.

   Minister Wever ta expresa su gratitud pa e rol activo cu Grupo Bennu ta hunga den fomenta crecemento y renovacion economico, y ta mira padilanti pa mas desaroyonan positivo den futuro cercano.