Alumnonan di scol a siña con ta mula maishi rabo

ORANJESTAD (AAN): Recientemente den oranan di mainta, un grupo di alumno di Colegio San Antonio MAVO di Santa Cruz, a sali rumbo pa Playa unda a bishita Fort Zoutman.

   Na e lugar aki cu ta rico cu obhetonan tradicional y unico di Aruba, nan a conoce un tiki mas di e historia di e isla.  A haya sa mas di e funcion di Fort Zoutman y e Aruba di antes.

   Tambe e alumnonan a siña con ta mula maishi di rabo, y a haya chens di tene e piedra chikito den man, y asina raspa e maishi pa asina haci esaki mas fini.

   E tabata algo fenomenal.  Lamentablemente e stoof di meneer Mario a laga nan na caya y no por a traha e pan bati mesoro cu e maishi rabo mula.  Pero nan a cera mainta cu un dushi sopi di carni di Chichi’s Snack.   Sigur e alumnonan ta gradici nan docente y tambe mentor pa e guia duna e dia aki.